تۋريزم ءمينيسترى جۇبايىنىڭ قوناق ءۇي بيزنەسى تۋرالى: ەشقانداي مۇددەلەر قاقتىعىسى جوق

ермек маржықпаев
Фото: t.me/Turizm_jane_sport_ministrligi

استانا. KAZINFORM – ق ر تۋريزم جانە سپورت ءمينيسترى ەرمەك مارجىقپايەۆ جۇبايىنىڭ بۋرابايداعى قوناق ءۇي بيزنەسى تۋرالى تىلشىلەر سۇراعىنا جاۋاپ بەردى.

«ءيا، وزدەرىڭىز جاقسى بىلەسىزدەر، ءبىزدىڭ وتباسىمىز بيزنەسپەن اينالىسادى. ءبىراق ونىڭ تۋريزم جانە سپورت مينيسترلىگىنە ەش قاتىسى جوق. ءبىز مەملەكەتتىك قىزمەتكە دەيىن، ياعني 2008-جىلعا دەيىن بيزنەسپەن اينالىستىق. الداعى جىلى بۇل كاسىپورىنعا 30 جىل بولادى. مەن مەملەكەتتىك قىزمەتكە كەلمەي تۇرىپ-اق، بۇل كاسىپورىننىڭ ءوز جولى بولدى»، - دەدى ەرمەك مارجىقپايەۆ ۇكىمەتتە وتكەن بريفينگتە.

مينيستر مۇندا ەشقانداي مۇددەلەر قاقتىعىسى جوق ەكەنىن اتاپ ءوتتى.

«مينيستر مەن ايماقتاعى شاعىن قوناقۇيلەر اراسىندا قانداي مۇددەلەر قاقتىعىسى بولۋى مۇمكىن؟ مۇنى قالاي ەلەستەتۋگە بولادى؟ بۇل سۇراق ماعان ۇنەمى قويىلادى، ءبىراق مەن تۋريزم مينيسترلىگى مەن سول نىسانداردى بايلانىستىرۋدىڭ مەحانيزمىن تۇسىنبەيمىن. ەشقانداي مۇددەلەر قاقتىعىسى جوق»، - دەدى ە. مارجىقپايەۆ.

ەستەرىڭىزگە سالا كەتەيىك، 2019-2023-جىلدارى ە. مارجىقپايەۆ اقمولا وبلىسىنىڭ اكىمدىگىن باسقارعان بولاتىن.

سوڭعى جاڭالىقتار