تەرىسكەيگە كوشكەن تۇركىستاندىقتار كاسىپ باستاپ، ەڭبەك ونىمدىلىگىن ارتتىرىپ وتىر

қоныс аудару
Фото: Фото: Казинформ

پاۆلودار وبلىسىنا قونىس اۋدارعان تۇركىستان وبلىسىنىڭ تۇرعىندارى كاسىپ باستاپ، جەرگىلىكتى حالىقتى جۇمىسپەن قامتىپ وتىر، دەپ حابارلايدى kazinform.

بۇگىنگى كۇنى وڭتۇستىك وڭىرلەردەن سولتۇستىككە قونىس اۋدارعان تۇرعىندار ەڭبەك ونىمدىلىگىن ارتتىرىپ وتىر. ولاردىڭ ءبىرى ينجەنەر، ءبىرى مۇعالىم بولىپ ابىرويلى قىزمەت ارتقارۋدا. ءتىپتى، تىنىمسىز ەڭبەكتىڭ ارقاسىندا كاسىپ اشىپ، كول كوسىر پايدا تاۋىپ وتىرعاندارى بار.

سايرام اۋدانىنىڭ تۇرعىنى زورەد ماۆلانوۆ پاۆلودار وبلىسى، كونستانتينوۆكا اۋىلىنا كوشىپ بارعان. جاس كاسىپكەردىڭ بۇگىندە «كاريم» فەرمەرلىك قوجالىعىندا 3,5 گەكتار كارتوپ القابى بار. ءناپاقاسىن جەر انادان ىزدەگەن شارۋا بيىل 100 توننا ءونىم الدى. ودان بولەك، شارۋانىڭ 400 گە جۋىق ءىرى قارا مالى دا بار.

«ءوزىم ۇيرەنگەن اتاقونىستان كوشۋ وڭاي بولعان جوق. 2019-جىلدىڭ ءساۋىر ايىندا اكە-شەشەممەن بىرگە كوشىپ كەلدىك. باستاپقىدا بۇل جەرلەر بوس جاتقان ەدى. وسىندا كەلە سالا مال شارۋاشىلىعىن قولعا الىپ، ءۇي سالىپ الدىق. «سىباعا» دەپ اتالاتىن اۋىل شارۋاشىلىعىن قولداۋ باعدارلاماسى ارقىلى 70 ميلليون تەڭگە نەسيە الىپ، كاسىپ باستادىق. ايتا كەتەرلىگى، سولتۇستىك ءوڭىرىنىڭ توپىراعى وتە قۇنارلى. ەگىن شارۋاشىلىعىمەن اينالاسۋعا وتە قولايلى. بىلتىردان بەرى كارتوپ ەگىپ، مول پايدا تاۋىپ كەلەمىن»، - دەيدى ول.

سايرام اۋدانى قارابۇلاق ەلدى مەكەنىندە تۇرىپ كەلگەن تۋلكينجون يۋسانتايەۆ تا وسى كونستانتينوۆكا اۋىلىنا تۇراقتاعان. ونىڭ قونىس اۋدارعانىنا 4 جىل بولدى. بالا كۇنىنەن ەگىن شارۋاشىلىعىنىڭ قىر-سىرىن مەڭگەرگەن ول، قازىرگى تاڭدا 20 گەكتار اۋماقتان ەگىن جيناپ، ساۋداعا شىعارىپ وتىر.

توپىراعى قۇنارلى، اۋاسى تازا اۋىلدا پياز، تۇرىپ، اسقاباق، قىرىققابات پەن قاربىز ەككەن. نەگىزگى ءونىمى كارتوپتى اپتا سايىن جارمەڭكەلەر ارقىلى ساۋداعا شىعارادى. الداعى ۋاقىتتا ەگىستىك كولەمىن ارتتىرۋ ارقىلى ءونىم كولەمىن دە مولايتۋدى جوسپارلاپ وتىر.

تەرىسكەيگە كوشىپ، كاسىپ اشقان ازاماتتاردىڭ اراسىندا تولەبي اۋدانىنىڭ تۇرعىندارى دا بار. كوكسايەك ەلدى مەكەنىندە تۋعان نۇرسۇلتان قاپپاروۆ وسىدان 6 جىل بۇرىن پاۆلودار وبلىسى شارباقتى اۋىلىنا قونىس اۋدارعان. «سۋىق جەر» دەپ جاتسىنباي، بىردەن ەڭبەك ەتۋگە كىرىسكەن. اۋەلى اۋىلعا قاجەتتى كاسىپ تۇرلەرىنەن باستاپتى. مەملەكەتتىك گرانت ەسەبىندە تومەنگى پايىزبەن نەسيە الىپ، شاشتاراز اشىپ، بىرنەشە تۇرعىندى جۇمىسپەن قامتىعان. كەيىن سامسا ءپىسىرىپ ساتاتىن ورىن دايىنداعان. قوس كاسىپتەن جاقسى پايدا تاپقان ول، اۋىل ايماعىنان ءدامحانا مەن كولىك جۋۋ بەكەتىن اشقان. وسىلايشا نۇرسۇلتان بۇگىندە اۋىلدىڭ 10 نان استام تۇرعىنىن جۇمىسپەن قامتىپ وتىر. جاس كاسىپكەر الداعى ۋاقىتتا كولىك جوندەۋ ورتالىعىن اشپاق نيەتتە.

مامانداردىڭ سوزىنە سۇيەنسەك، تۇركىستان وڭىرىنەن پاۆلودار وڭىرىنە قونىس اۋدارۋشىلار قاتارى جىل سايىن ارتىپ كەلەدى. ماسەلەن، ەڭبەك جانە حالىقتى الەۋمەتتىك قورعاۋ مينيسترلىگى ەسەبىنەن بولىنگەن كۆوتا نەگىزىندە بيىلعى جىلدىڭ 9 ايىندا 340 وتباسى، 1426 ادام قونىس اۋدارعان.

«جالپى مەملەكەتتىك كۆوتاعا قاراماستان، ءوز ەركىمەن وڭتۇستىكتەن سولتۇستىككە قونىس اۋدارىپ جاتقانداردا كوپ. كوشتى باستاپ كەلۋشىلەر ورنىعىپ العان سوڭ، اۋىلدا جۇمىسسىز جۇرگەن تۋىستارىن، تانىستارىن ءوز جانىنا شاقىرىپ الادى. ولاردا ەگىن جانە مال شارۋاشىلىعىمەن اينالىسىپ جاتىر. ال جۇبايلارى مەكتەپكە ءمۇعالىم، اۋرۋحاناعا دارىگەر، بالاباقشاعا تاربيەشى بولىپ قىزمەتكە ورنالاسادى. بالالارى دا اۋىل مەكتەپتەرىنە كەلىپ، بالا سانىن كوبەيتۋدە. ەڭ باستىسى - جىل وتە كۇنگەيلىكتەر تەرىسكەيگە كوشۋ ارقىلى ءوز ءومىرىن جاقسارتۋعا بولاتىنىنا كوزى جەتكىزىپ جاتىر»، - دەيدى تۇركىستاندىقتاردىڭ جاعدايىن ءبىلىپ قايتقان دەلەگاتسيا مۇشەسى، الەۋمەتتىك جەلى بەلسەندىسى قايرات كارىبايەۆ.

سوڭعى جاڭالىقتار