تۇرىكمەنستان پرەزيدەنتى اقابا پروتسەسى سامميتىنە قاتىسۋ ءۇشىن استاناعا كەلدى
استانا. KAZINFORM - تۇرىكمەنستان پرەزيدەنتى سەردار بەردىمۇحامەدوۆ اقابا پروتسەسى سامميتىنە قاتىسۋ ءۇشىن قازاقستاننىڭ ەلورداسىنا كەلدى.
ەرتەڭ 6-قاراشادا استانادا اقابا پروتسەسى سامميتى وتەدى.
مۇنداي فورماتتاعى كەزدەسۋگە ورتالىق ازيا العاش رەت ۇيىمداستىرۋشىلاردىڭ ءبىرى رەتىندە قاتىسىپ وتىر.
اقابا پروتسەسى - 2015 -جىلى يوردانيا كورولى ⅱابداللا باستاماشى بولعان حالىقارالىق باستاما.
ونىڭ باستى ماقساتى - تەرروريزمگە، ەكسترەميزمگە جانە ترانسۇلتتىق قىلمىسقا قارسى كۇرەستە مەملەكەتتەر اراسىنداعى ىنتىماقتاستىقتى نىعايتۋ.
بۇعان دەيىن پرەزيدەنت قاسىم-جومارت توقايەۆ اقابا پروتسەسىن جوعارى باعالايتىنىن جانە الداعى سەسسيانىڭ جاساندى ينتەللەكت سالاسىنداعى قاۋىپسىزدىك تاقىرىبىنا ارنالاتىنىن حابارلاعان ەدى.
ءوز كەزەگىندە يوردانيا كورولى ⅱابداللا بەن ءال-حۋسەين وڭىرلىك قاۋىپسىزدىكتى قامتاماسىز ەتۋ، سونداي-اق تەرروريزم مەن ەكسترەميزمگە قارسى كۇرەس ىسىندە قازاقستانمەن ىقپالداستىقتى كەڭەيتۋگە مۇددەلى ەكەنىن راستادى.
