پەتروپاۆلدا توعىزقۇمالاقتان رەسپۋبليكالىق چەمپيونات ءوتىپ جاتىر

پەتروپاۆلدا توعىزقۇمالاقتان جاس وسپىرىمدەر مەن جاستار كوماندالارى اراسىندا ق ر چەمپيوناتى باستالدى. جارىسقا 245 سپورتشى قاتىسىپ جاتىر، دەپ حابارلايدى Kazinform.

سولتۇستىك قازاقستان وبلىسىندا تۇڭعىش رەت توعىزقۇمالاقتان جاس وسپىرىمدەر مەن جاستار اراسىندا رەسپۋبليكالىق چەمپيونات باستالدى. ەلىمىزدىڭ 13 وبلىسىنان جانە استانا، الماتى، شىمكەنت قالالارىنان 245 سپورتشى قاتىسىپ جاتىر. بارلىعى 16 كوماندا، 21 جاسقا دەيىنگىلەر توپ-توپقا ءبولىنىپ، جەتى جاس ساناتى بويىنشا ۇزدىكتەر انىقتالماق.

«سوڭعى جىلدارى س ق و- دا ۇلتتىق ويىندار قارقىندى دامىپ كەلەدى. جەتىستىكتەر بار. توعىزقۇمالاق ويىنىنان ءار مەكتەپتە ۇيىرمە جۇمىس ىستەيدى. قازان ايىندا وبلىستىق چەمپيونات ءوتتى. ىرىكتەۋ دوداسىنا بۇرىن 30-40 ادام عانا قاتىسسا، بيىل 200 دەن اسىپ كەتتى.

ادامدىق قاسيەت - ويدىڭ ۇشقىرلىعىن، سانانى دامىتاتىن بۇل ويىن اتا-بابامىزدان كەلە جاتىر. رەسپۋبليكالىق چەمپيوناتتىڭ بىزدە ۇيىمداستىرىلۋى سپورتتىڭ وسى ءتۇرىنىڭ وڭىردە ودان ءارى دامۋىنا ۇلكەن سەپ»، - دەيدى س ق و بويىنشا توعىزقۇمالاق فەدەراتسياسىنىڭ پرەزيدەنتى جومارت وماروۆ.

بۇل جارىس ارقىلى الەمدىك دودالاردا ونەر كورسەتەتىن سپورتشىلار انىقتالماق.

«الماتى وبلىسىنان 17 وقۋشى كەلىپ وتىر. ولاردىڭ بارلىعى ءبىرىنشى ورىن يەگەرلەرى، ياعني كىلەڭ مىقتىلار. پەتروپاۆلعا العاش كەلىپ وتىرمىز. چەمپيونات جوعارى دەڭگەيدە ءوتىپ جاتىر، قارسىلاستارىمىزعا ساتتىلىك تىلەيمىز.

توعىزقۇمالاق بۇگىندە الەمگە تانىمال. بيىل وقۋشىلار اراسىندا العاش رەت الەم چەمپيوناتى، موڭعوليادا ازيا چەمپيوناتى ءوتتى. سول جارىستاردا ءبىزدىڭ الماتى وبلىسىنىڭ سپورتشىلارى وتە جاقسى كورسەتكىشكە قول جەتكىزدى»، - دەيدى الماتى وبلىسىنىڭ وكىلى، ارداگەر سپورتشى گۇلسىم مۇسايەۆا.

توعىزقۇمالاقتان رەسپۋبليكالىق چەمپيونات پەتروپاۆلدا 13-19- قاراشا ارالىعىندا وتەدى.