پەتروپاۆلدا سۋ باسقان اۋماقتا بايلاۋلى قالعان ءيت قۇتقارۋشىسىنىڭ قولىندا كۇشىكتەدى
پەتروپاۆل. KAZINFORM - پەتروپاۆلدا تۇرعىنداردىڭ كەيبىرى سۋ تاسقىنىنا بايلانىستى قاۋىپسىز اۋماققا كوشكەندە ءۇي جانۋارلارىن قالدىرىپ كەتكەن. ولاردى اسكەري قىزمەتشىلەر مەن پوليتسەيلەر قۇتقارىپ جاتىر.
پەتروپاۆلداعى تەپليچنوە ەلدى مەكەنىندە ورنالاسقان ساياجاي قاۋىمداستىقتارىنا رەيد بارىسىندا 99275 اسكەري ءبولىمى اۋماقتىق قورعانىس باتالونىنىڭ ماماندارى بايلاۋلى تۇرعان ءيتتى بايقاپ قالادى. قاسىنداعى ءۇي تۇرعىندارى دا ءيتىن بايلاۋلى قالدىرىپ كەتىپتى.
«سۇر ءيت تە، قارا ءيت بىزگە ءتىپتى ۇرگەن دە جوق، قۇتقارۋعا كەلگەنىمىزدى سەزگەندەي. ولار ءيت ۇيشىگىنىڭ ۇستىندە وتىردى. ەفرەيتور مەرەي نۇرعوجين ءيتتى كوتەرگەن كەزدە، ول قولىندا كۇشىكتەپ، ءوزى سياقتى قارا كۇشىكتى تۋدى»، - دەيدى باتالوننىڭ بارلاۋ ۆزۆودىنىڭ كومانديرى اسقان راحيموۆ.
اسكەري قىزمەتشىلەر سوڭعى ءبىر اپتانىڭ ىشىندە عانا قاۋىپتى اۋماقتان 13-18 ءۇي جانۋارىن قۇتقارعان.
«ادامدار ۇرەيگە بوي الدىرىپ، بارلىعىن تاستاي قاشادى. كەيبىرى وسىلايشا يتتەرىن دە بوساتپاي كەتەدى. ءبىر ءۇيدىڭ قوراسىنان قامالىپ تۇرعان قويلاردى تاپتىق. سىرتىنان جاۋىپ كەتكەن. تاعى ءبىر ءۇيدىڭ قوراسىنان قويانداردى الىپ شىقتىق. كوبىنە تاۋىقتاردى شىعاردىق. مۇمكىن اپاراتىن جەرلەرى بولماعان شىعار. ءبىراق ءبىز سۋ تاسقىنىنا دەيىن ءۇي-ءۇيدى ارالاپ، ءۇي جانۋارلارىن بىزگە بەرىڭدەر، ولاردى ارنايى ەۆاكۋاتسيالىق ورىنعا جەتكىزەمىز دەپ ايتتىق. مىسالى زارەچنىي كەنتىندە ءبىز يتتەردى اكەتىپ، ولاردى مەكتەپتىڭ جانىنا بايلادىق. وسىلايشا ءبىز جانە ۆولونتەرلەر تاماقتاندىرىپ وتىردىق»، - دەيدى اسقان راحيموۆ.
ماماننىڭ ايتۋىنشا، قۇتقارىلعان جانۋارلار توتەنشە جاعدايلار جونىندەگى دەپارتامەنت قىزمەتكەرلەرىنە تابىستالادى. ال ولار شارا قولدانىپ، ورنالاستىرادى.
بۇعان دەيىن بەسكول اۋىلىندا 109 ءۇيدىڭ سۋ استىندا قالعانىن ايتقان ەدىك.
