پەتروپاۆلدا بيىل وتباسى شىرقىن بۇزعان 300 گە جۋىق ادام قاماۋعا الىندى

پەتروپاۆلدا بيىل وتباسىلىق-تۇرمىستىق قاتىناستار سالاسىندا 1141 قۇقىق بۇزۋشىلىق تىركەلدى. 12 قىلمىس جاسالعان، ونىڭ ەكەۋى كىسى ءولتىرۋ فاكتىسى، ال بەسەۋى - دەنساۋلىققا قاساقانا اۋىر زيان كەلتىرۋگە قاتىستى، دەپ حابارلايدى Kazinform.

وڭىرلىك كوممۋنيكاتسيالار قىزمەتىندە «تۇرمىستىق زورلىق-زومبىلىقتىڭ الدىن الۋ» ماسەلەسى بويىنشا پەتروپاۆل پوليتسەيلەرى ەسەپ بەردى. ءبىرىنشى پوليتسيا ءبولىمى باستىعىنىڭ ورىنباسارى ءابىلقايىر قازجاننىڭ مالىمەتىنشە، وبلىس ورتالىعىندا پروفيلاكتيكالىق ەسەپتە ءتۇرلى سانات بويىنشا 2362 ادام تۇر.

جىل باسىنان وتباسىلىق-تۇرمىستىق قاتىناستار سالاسىندا 1141 قۇقىق بۇزۋشىلىق تىركەلدى. 874 ادام جاۋاپقا تارتىلعان، سونىڭ ىشىندە 85 ى ەسكەرتۋ تۇرىندەگى جازا السا، 294 ى اكىمشىلىك قاماۋعا الىندى. 491 ماتەريال تاراپتاردىڭ تاتۋلاسۋىنا بايلانىستى توقتاتىلعان.

«دەنساۋلىققا قاساقانا جەڭىل زيان كەلتىرگەنى ءۇشىن وتباسىلىق-تۇرمىستىق قاتىناستاردا تۇرعان 89 ادام جاۋاپقا تارتىلدى. ونىڭ 22 سى ەسكەرتىلدى، 8 ى اكىمشىلىك قاماۋعا الىندى؛ 59 تاراپ تاتۋلاستى.

ۇرىپ-سوعۋ ءۇشىن 3 ادام جازالانسا، سونىڭ بىرەۋى قامالدى.

قۇقىق بۇزۋشىلارعا قاتىستى 1105 قورعاۋ ۇيعارىمى، 224 ەرەكشە مىنەز-قۇلىق تالاپتارى شىعارىلدى»، - دەيدى ءابىلقايىر قازجان.

قوعامدىق ورىندا ماس كۇيىندە جۇرگەنى ءۇشىن 4970 قۇقىق بۇزۋشى اكىمشىلىك جاۋاپكەرشىلىككە تارتىلعان. سونىڭ ىشىندە 367 ادام اكىمشىلىك قاماۋعا الىندى.

«ماسكۇنەمدىكتەن ماجبۇرلەپ ەمدەۋ ءۇشىن جامبىل اۋدانى بلاگوۆەشەنكا اۋىلىنىڭ مامانداندىرىلعان ەمدەۋ-پروفيلاكتيكالىق مەكەمەسىنە 67 ادام جىبەرىلدى، ەرىكتى نەگىزدە پسيحيكالىق دەنساۋلىق ورتالىعىنا 34 ماسكۇنەم ورنالاستىرىلدى.

جىل باسىنان وتباسىلىق-تۇرمىستىق قاتىناستار سالاسىندا 12 قىلمىس جاسالدى، سونىڭ سەگىزىندە قىلمىسكەرلەر ماس بولعان. سونىڭ ىشىندە كىسى ولتىرۋگە قاتىستى ەكى فاكتى، دەنساۋلىققا قاساقانا اۋىر زيان كەلتىرۋدىڭ 5 فاكتىسى، دەنساۋلىققا قاساقانا اۋىرلىعى ورتاشا زيان كەلتىرۋدىڭ 3 فاكتىسى تىركەلدى»، - دەيدى پوليتسەي.

اۆتور

اقەركە داۋرەنبەك قىزى