پەتروپاۆلدا اقساقالدار باتا ايتۋدان سايىسقا ءتۇستى
پەتروپاۆل. KAZINFORM - پەتروپاۆلدا اقساقالدار اراسىندا باتا بەرۋدەن «اق باتا» وبلىستىق سايىسى ءوتتى.
ءىس-شاراعا پەتروپاۆلدان، اۋدانداردان اقساقالدار قاتىستى. سايىس ەكى كەزەڭنەن تۇردى. قاتىسۋشىلار سالت-ءداستۇر جايىندا بىلىمدەرىن كورسەتىپ، سۇراقتارعا جاۋاپ بەردى. ەكىنشى كەزەڭدە اقساقالدارعا ءارتۇرلى جاعدايلاردا ايتىلاتىن باتالاردىڭ تاقىرىپتارى بەرىلدى. ولار سول بويىنشا باتا بەردى.
- ءدىن مەن ءداستۇر ەگىز ۇعىم. سونداي-اق قازاقتا «باتامەنەن جەر كوگەرەر» دەگەن ناقىل ءسوزى بار. وسى ەلىمىزدىڭ ءبىر بەرەكەسىن ارتتىرۋ ماقساتىندا جانە اقساقالدارىمىزدىڭ مارتەبەسىن كوتەرۋ ماقساتىندا وسى ءىس-شارانى ۇيىمداستىردىق. زامانعا قاراي ادامى. ءبىراق اقساقال بولعاننان كەيىن، 60-70 تەن اسقاننان كەيىن داستارحاندا وتىرىپ باتا بەرە الاتىنداي جاعدايدا بولۋ كەرەك. باتا بەرۋ ءۇشىن دە ادامنىڭ ءجۇرىپ وتكەن جولى بولۋى قاجەت. وزىندىك ايتار ءسوزى بولعانى ءجون. «جاس كەزىڭدە بايقارىڭ بولماسا، قارتايعاندا ايتارىڭ بولمايدى» دەگەن بار، - دەيدى وبلىستىڭ باس يمامى حامزات ادىلبەكوۆ.
بەسكول اۋىلىنان كەلگەن جاپار ءباري ۇلىنىڭ جاسى 70 كە تاياعان. ايتۋىنشا، سايىس تۋرالى ون شاقتى كۇن بۇرىن حابارلانعان. ءبىراق جاس ۇلعايعاندا جاڭا باتا جاتتاۋ وڭايعا سوقپاپتى.
- ماعان «جىرتىس» دەگەن نە دەگەن سۇراق كەلدى. سونداي-اق العىس ايتۋ باتاسىن بەرەمىن. بىلگەنىمشە جاۋاپ بەردىم. ماسەلەن «جىرتىستىڭ» ەكى ءتۇرى بولادى. تويدان كەلگەن جىرتىس جانە جاسى جەتىپ، 80-90 عا كەلىپ قايتقان ادامنىڭ جاسىن بەرسىن دەپ ىرىمداپ بەرەتىن جىرتىس بار. توي جىرتىسى دەگەن، كەلىن كەلگەندە قۇدالار جاعى دوربا اكەلەدى. سول دوربانىڭ ىشىندە سىي رەتىندە ماتا بولادى. سونى جىرتىپ، تويشى قاۋىمعا تاراتادى، - دەيدى اقساقال.
سايىس بارىسىندا قاتىسۋشىلار باتا بەرۋ ونەرىمەن قاتار، ءدىني بىلىمدەرى مەن سالت-داستۇرگە جەتىكتىگىن كورسەتتى. قازىلار القاسى اقساقالداردىڭ باتا بەرۋ شەبەرلىگىن، ءتىل بايلىعى مەن شەشەندىگىن باعالاي وتىرىپ، ۇزدىكتەردى انىقتادى. ناتيجەسىندە «قىزىلجار» قالالىق مەشىتىنىڭ اتىنان كەلگەن ءتالي كاريەۆ ءبىرىنشى ورىندى جەڭىپ الدى. جەڭىمپازدار باعالى سىيلىقتارمەن ماراپاتتالادى جانە رەسپۋبليكالىق بايقاۋعا جولداما الدى.
بۇعان دەيىن پەتروپاۆلدا جىلىكتى قولمەن سىندىرۋدان جارىس وتكەنىن جازعان ەدىك.
