پەتروپاۆلدا داعدارىس ورتالىعى اشىلدى

ورتالىقتا ايەلدەر بالالارىمەن بىرگە ۋاقىتشا تۇرىپ، مامانداردىڭ كومەگىن الا الادى. نىسان وڭىرلىك قولداۋ جۇيەسىنە ەندى.

پەتروپاۆل قالالىق اكىمدىگىنىڭ مالىمەتىنشە، بۇل جەردە ايەلدەرگە الەۋمەتتىك، زاڭگەرلىك جانە پسيحولوگيالىق كومەك كورسەتىلەدى.

وسى ماقساتتا ارنايى كابينەتتەر جابدىقتالعان. سونداي-اق، الەۋمەتتىك پەداگوگ، بالالار تاربيەشىسى جانە مەديتسينا قىزمەتكەرى دە بار. بالالار ءۇشىن ويىن الاڭى مەن وقۋعا ارنالعان ورىن قاراستىرىلعان. سونداي-اق اسحانا، دەمالىس جانە بوس ۋاقىتتى وتكىزۋ ايماقتارى بار. بۇل جەردە جارتى جىلعا دەيىن ۋاقىتشا تۇرۋعا مۇمكىندىك بار.

- ءبىز تۇرمىستىق زورلىق-زومبىلىققا تاپ بولعان ايەلدەردىڭ جانايقايىن ەستىپ، ولار ءۇشىن قاۋىپسىز ورىن دايىندادىق. ورتالىقتا بىلىكتى كومەك الادى. قالا تۇرعىندارى عانا ەمەس، ءوڭىردىڭ كەز كەلگەن اۋدانىنان ايەلدەر جۇگىنە الادى،-دەدى پەتروپاۆل قالاسى اكىمىنىڭ ورىنباسارى.

ورتالىقتى قۇرۋعا جەرگىلىكتى بيۋدجەتتەن شامامەن 172 ميلليون تەڭگە جۇمسالدى. مامانداردىڭ ايتۋىنشا، قىزمەت الۋشىلاردىڭ قاۋىپسىزدىگى ماقساتىندا ورتالىقتىڭ مەكەنجايى جاريالانبايدى. كومەك قاجەت بولعان جاعدايدا 102 نەمەسە 111 نومىرلەرىنە حابارلاسۋعا بولادى.

بۇعان دەيىن شىمكەنتتە پوليتسياعا تۇرمىستىق زورلىق-زومبىلىق بويىنشا 4 مىڭنان استام شاعىم تۇسكەنىن جازعان ەدىك.