پەتروپاۆل تۇرعىنىنا تەرروريستىك ۇيىمنىڭ تۋىن جاريالاعانى ءۇشىن ايىپپۇل سالىندى

 استانا. KAZINFORM - پەتروپاۆل قالاسىنىڭ 53 جاستاعى تۇرعىنى الەۋمەتتىك جەلىدە ءموبيلدى قوسىمشاسىنىڭ اككاۋنت پروفيلىنە تەرروريستىك ۇيىمنىڭ تۋىن جاريالاعان. بۇل ارەكەتى ءۇشىن وعان قوماقتى ايىپپۇل سالىندى.

ق ر تەرروريزمگە قارسى ورتالىعىنىڭ مالىمەتىنشە، بۇل فاكتىنى سولتۇستىك قازاقستان وبلىسى ءى ءى د ەكسترەميزمگە قارسى كۇرەس باسقارماسىنىڭ قىزمەتكەرلەرى جەدەل ىزدەستىرۋ شارالارى بارىسىندا انىقتاعان.

- ەر ادام جاريالاعان تۋدىڭ سۋرەتى ق ر اۋماعىندا تىيىم سالىنعان حالىقارالىق تەرروريستىك ۇيىمنىڭ قىزمەتىمەن بايلانىستى. سوت شەشىمىمەن پەتروپاۆل تۇرعىنى 100 ا ە ك (369200 تەڭگە) كولەمىندە ايىپپۇل تۇرىندە اكىمشىلىك جاۋاپقا تارتىلدى، - دەلىنگەن حابارلامادا.

جىل باسىنان بەرى سولتۇستىك قازاقستان وبلىسى ءى ءى د ەكسترەميزمگە قارسى كۇرەس باسقارماسىنىڭ قىزمەتكەرلەرى ەكسترەميستىك باعىتتاعى ادەبيەتتەردى زاڭسىز الىپ ءوتۋ ارەكەتىن توقتاتىپ، ينتەرنەت ارقىلى ءدىني ماتەريالداردى زاڭسىز تاراتۋدىڭ 5 فاكتىسىن انىقتاعان.

پوليتسيا قىزمەتكەرلەرى ءدىني مازمۇنداعى تىيىم سالىنباعان اقپاراتتىق ماتەريالداردى جانە ءدىني ماقساتتاعى زاتتاردى تەك عيبادات ورىندارىندا، ءدىني ءبىلىم بەرۋ ۇيىمدارىندا جانە ارنايى بەكىتىلگەن ورىنداردا تاراتۋعا رۇقسات ەتىلەتىنىن ەسكەرتەدى.

اۆتور

ورالحان قوجانوۆ