پەتروپاۆل تۇرعىنى بوگەت ىشىندە قالىپ قويعان سۋدان تەز قۇتىلۋ ءادىسىن ويلاپ تاپتى
پەتروپاۆل. KAZINFORM - پەتروپاۆل تۇرعىنى تىلەۋبەرگەن بايازيتوۆ تاسقىن سۋمەن كۇرەستىڭ وزىندىك جولىن ۇسىنىپ وتىر. ونىڭ ءادىسىن قولدانۋ ارقىلى كولدەن ەلەكتر قۋاتىن دا الۋعا بولادى.
تىلەۋبەرگەن بايازيتوۆتىڭ ۇسىنىپ وتىرعان ءادىسى - فيزيكاعا، سونىڭ ىشىندە گراۆيتاتسيا زاڭىنا نەگىزدەلگەن. ىسكە اسىرۋعا كوپ قاراجاتتى قاجەت ەتپەيدى.
«مەنىڭ ۇسىنىپ وتىرعان ءادىسىم قازىرگى ۋاقىتتا وزەكتى. سۋ تاسقىنىنىڭ الدىندا، ماسەلەن قالا ماڭىنا بوگەتتەر سالىنعانىمەن سۋ ونىڭ ۇستىنەن ءوتىپ كەتىپ، قانشاما ءۇي سۋ استىندا قالدى. قازىر ول سۋ كەيىن كەتەدى، ءبىراق بوگەتتەن وتە الماي، سۋ قازانشۇڭقىردا قالعانداي بولادى. مىنە سول كەزدە مەنىڭ ءادىسىمدى قولدانۋعا بولادى. ول ءۇشىن ديامەترى شامامەن 50 س م، ءبىراق، نەعۇرلىم ۇلكەن بولسا، سوعۇرلىم تەز كەتەدى، قۇبىر كەرەك. ونىڭ ءبىر باسىن سورىلۋى ءتيىس سۋعا سالىپ، بوگەتتىڭ بويىمەن جۇرگىزىپ وتىرىپ، ار جاعىنا ەكىنشى باسىن شىعارامىز. كەيىن ەكى باسىن ۋاقىتشا بىتەپ، ۇستىنەن تەسىپ، قۇبىردىڭ ءىشىن سۋعا تولتىرامىز. سوڭىنان ونى دۇرىستاپ بەكىتىپ، ەكى قۇبىردىڭ باسىن ءبىر مەزەتتە اشقاندا جاڭاعى سورىلۋى ءتيىس سۋىمىز گۇرىلدەپ كەلەسى بەتكە اعا جونەلەدى»، - دەيدى تىلەۋبەرگەن بايازيتوۆ.
بۇل ءادىستى ەر ادام اسكەردە جۇرگەندە قولدانىپ كورگەن. اسكەري ءبولىم سۋعا كەتە جازداعاندا ساربازدار ءبىر ءتۇن ىشىندە قۇبىرلاردان قاجەتتى قوندىرعىنى جاساپ، سۋدىڭ ارناسىن بۇرىپ جىبەرگەن. سودان بەرى 50 جىلدان استام ۋاقىت وتكەن. ءبىر-ەكى رەت وسى ءادىستى قولدانىسقا ەنگىزۋدى ۇسىنعانىمەن، ەستىر قۇلاق بولماعان.
تىلەۋبەرگەن بايازيتوۆ م. قوزىبايەۆ - اتىنداعى سولتۇستىك قازاقستان ۋنيۆەرسيتەتىنىڭ وقىتۋشىسى، اۋىل شارۋاشىلىعى عىلىمدارىنىڭ كانديداتى. بولاشاق ۆەتەرينارلاردى دايارلاۋعا ات سالىسىپ ءجۇر. ايتۋىنشا، كوپشىلىك ۆەتەريناريا ءىلىمىن تار بەيىندى سالا دەپ ۇعادى. الايدا ول باسقا عىلىمدارمەن ساباقتاسىپ جاتىر.
«سەن ۆەتەرينارسىڭ، فيزيكا تۋرالى قالاي ايتاسىڭ دەيدى ماعان كوپشىلىك. بۇل - قاتە ۇعىم. جاقسى ۆەتەرينار مامان بولۋ ءۇشىن تەك فيزيكا عانا ەمەس، ەكونوميكا، قۇرىلىس، ماتەماتيكا، گەنەتيكا، بيولوگيا، مەديتسينا، تاعى باسقا ىلىمدەردەن حابارىڭ بولۋى كەرەك. زامان تالابى دا سونداي. ال جاڭاعى ادىسكە كەلەر بولساق، ونى كولدەردە قولدانىپ، ەلەكتر قۋاتىن وندىرۋگە بولادى. ياعني جاسىل ەنەرگەتيكا. ول ءۇشىن تەك تۋربينا قويۋ قاجەت. مەن بۇدان پايدا كورەيىن دەپ وتىرعان جوقپىن، سوندىقتان پاتەنت دە المادىم. ماقساتىم - قولدانىسقا ەنسە، حالىققا پايداسى تيسە»، - دەيدى تىلەۋبەرگەن بايازيتوۆ.
اۆتور
اقەركە داۋرەنبەك قىزى
