پەتروپاۆل اكىمى زارەچنىي كەنتىنىڭ تۇرعىندارىنا ۇندەۋ جولداپ، تەز ارادا ۇيلەرىن بوساتۋدى سۇرادى
پەتروپاۆل. KAZINFORM - پەتروپاۆلداعى زارەچنىي كەنتى تاسىعان ەسىل سۋى باساتىن قاۋىپتى اۋماقتا تۇر. اپتا سوڭىنا قاراي وبلىس ورتالىعىنا تاسقىن سۋ كەلمەك، الايدا تۇرعىندار قاۋىپسىز جەرگە كەتۋگە اسىعار ەمەس. وسىعان وراي قالا اكىمى ۇندەۋ جولدادى.
پەتروپاۆل قالاسى اكىمى سەرىك مۇحامەديەۆتىڭ ايتۋىنشا، پەتروپاۆلدا ەسىل وزەنى تاسيتىنى انىق. زارەچنىي كەنتى ەرەكشە قاۋىپتى ايماقتا تۇر. 2017-جىلى بولعان اۋقىمدى سۋ تاسقىنى كەزىندە 224 ءۇيدىڭ 132 ءسى جانە جۇزدەگەن ساياجاي سۋ استىندا قالدى. سول جىلى سەرگەيەۆ سۋ قويماسىنىڭ تاسىعان سۋى 338 سانتيمەتر كوتەرىلدى. ال قازىر ەرنەۋىنەن اسىپ توگىلۋ بيىكتىگى 425 سانتيمەترگە جەتكەن، ياعني پەتروپاۆلعا مول سۋ كەلە جاتىر.
«زارەچنىي كەنتىنە مول سۋدىڭ العاشقى تولقىنى اپتانىڭ سوڭىندا باتىس جاعىنان قاراي كەلەدى. 2020-جىلى ول جەردە بيىكتىگى 2,8 مەتر بوگەت تۇرعىزىلدى، ول بۇگىنگى كۇنگە دەيىن ەلدى مەكەننىڭ شىعىس بولىگىن قورعادى، بۇل زارەچنىيعا جىل سايىن كەلەتىن سۋ تاسقىنىنان قورعاۋعا جەتكىلىكتى بولدى. قازىر ءبىز بوگەتتىڭ بيىكتىگىن 4,5 مەترگە دەيىن جەتكىزىپ، نىعايتىپ جاتىرمىز، بۇل جۇمىسقا بارلىق قىزمەتتەر، ەرىكتىلەر مەن قاراپايىم تۇرعىندار قاتىسىپ جاتىر.
ءبىز ودان دا جوعارى تۇرعىزا المايمىز، جانىندا كول بار. زارەچنىي وزەننىڭ جايىلماسىندا ورنالاسقان جانە بۇكىل كەنتتى قورشاپ بوگەت سالۋعا مۇمكىندىك جوق. ياعني، سۋ - ەلدى مەكەنگە كىرەدى. ەسىل وزەنىنىڭ ەڭ تومەنگى جەرىندە ساياجاي ۋچاسكەلەرى ورنالاسقان. سوندىقتان مىندەتتى تۇردە قاۋىپسىز جەرگە كوشۋ كەرەك!
مەن ساياجايلاردا تۇراقتى تۇراتىن تۇرعىندار بار ەكەنىن بىلەمىن. قىزمەتتەر كەشەدەن باستاپ ەۆاكۋاتسيالاۋدى باستادى. ءبىراق كەيبىر تۇرعىندار ساياجايلار مەن تۇرعىن ۇيلەردى قالدىرعىسى كەلمەيدى. ارينە، جىلدار بويى جيناعان دۇنيە-مۇلىكتى قالدىرۋ قيىن ەكەنىن تۇسىنەمىن. ءبىراق قازىر ءسىزدىڭ ومىرىڭىزگە قاۋىپ ءتونىپ تۇر! قىزمەتتەردىڭ تالابىن ەسكەرىڭىز. سۋدىڭ ەسىككە دەيىن جەتۋىن كۇتپەڭىز. قازىر ارەكەت ەتۋ كەرەك!
مەن تۇرعىنداردىڭ نارازىلىعىن جانە ءسىزدىڭ پىكىرلەرىڭىزدى وقىپ، كورىپ جاتىرمىن. ءبىراق ءبىز تابيعي اپاتتى توقتاتا المايمىز. تاعى دا قايتالايمىن، بىردە-ءبىر تۇرعىن مەن ونىڭ مۇلكى نازاردان تىس قالمايدى! مەن قالا اكىمى رەتىندە قولىمنان كەلگەننىڭ ءبارىن جاسايمىن!» - دەدى پەتروپاۆل اكىمى سەرىك مۇحامەديەۆ.
بۇعان دەيىن سەرگەيەۆ سۋ قويماسىندا سۋ دەڭگەيىنىڭ ءالى دە كوتەرىلىپ جاتقانىن ايتقان ەدىك.
