تۇرسىنبەك، قايرات نۇرتاس، ءابدىجاپپار... كەلەسى كىم

استانا. KAZINFORM - سوڭعى كۇندەرى ەلىمىزگە تانىمال مادەنيەت سالاسىنىڭ وكىلدەرى مادەنيەتسىزدىك تانىتىپ، قاماۋعا الىنعانى قوعامدى ەلەڭ ەتكىزگەنى راس. ادەتتە تويدا جۇرەتىن انشىلەردىڭ تەمىر توردىڭ ار جاعىنان تابىلۋى الەۋمەتتىك جەلىلەردە قىزۋ تالقىعا ءتۇسىپ جاتىر.

«تۇرسىنبەك، تۇرسىنبەك، جۇرەكتەر دۇرسىلدەپ» دەپ ساحناعا شىعاتىن تۇرسىنبەك قاباتوۆ تۇراقتى كورەرمەندەرىنىڭ جۇرەگىن قاتتى دۇرسىلدەتىپ قويدى. تانىمال ازىلكەشتىڭ كونسەرتىن ۇزبەي كورەتىندەر «نە بوپ قالدى ەكەن؟» دەپ الاڭداپ قالدى. سويتسەك، قازاقستاندىق شوۋمەن 2-ماۋسىمدا تاڭەرتەڭ ماس كۇيىندە الماتى - استانا رەيسىندە بالاعات ءسوز ايتىپتى.

سوتتا قاباتوۆ بورتسەرىكتەردىڭ جۇمىسىنا كوڭىلى تولماعانىن، سول سەبەپتى اشۋعا بۋلىققانىن جاسىرمادى. ءبىراق ول ۇشاقتا بالاعات ءسوز ايتقان-ايتپاعانىن ناقتى بىلمەيدى، دەي تۇرعانمەن قوعامدىق ءتارتىپتى بۇزعانى ءۇشىن كەشىرىم سۇراعان. ال، سوتتا كۋاگەرلەر قاباتوۆتىڭ رەيستە ماس بولعانىن جانە بالاعات ءسوز ايتقانىن راستادى. وسىلايشا قاباتوۆ بەس كۇنگە قاماۋعا الىنعان بولاتىن.

جازاسىن وتەپ شىققاننان كەيىن تۇرسىنبەك قاباتوۆ بىردەن استانا تورىندە ۇلكەن كونسەرت بەردى. قاماۋعا الىنعانىن ازىلدەرگە قوسىپ، جينالعانداردى كۇلكىگە قارق قىلدى. كونسەرتتە ءانشى قايرات نۇرتاستىڭ قاماۋعا الىنعانىن دا اتاپ ءوتتى. سونىمەن، قايرات نۇرتاس نە ءبۇلدىردى ەكەن؟

بەلگىلى بولعانداي، 4-شىلدەدە ساعات 20:00 شاماسىندا الماتى- استانا باعىتىنداعى ۇشاق بورتىندا قايرات نۇرتاس پەن اسىلبەك بەكقايىروۆ اراسىندا اۋىزشا جانجال تۋىنداپ، ارتى توبەلەسكە ۇلاسقان.

بۇل وقيعاعا قاتىستى 5-شىلدەدە ونلاين فورماتتا سوت وتىرىسى ءوتتى. تانىمال ءانشى ەكى باپ بويىنشا ايىپتالدى:

- ق ر اكىمشىلىك كودەكسىنىڭ 73-بابىنىڭ 1-تاراۋ 1-بولىگى بويىنشا، قاساقانا جەڭىل دەنە جاراقاتىن كەلتىرگەنى ءۇشىن؛

- ق ر اكىمشىلىك كودەكسىنىڭ 434-باپ 2-بولىگى بويىنشا، ۇشاق بورتىندا ۇساق بۇزاقىلىق جاساعانى ءۇشىن.

قوزعالعان ءبىرىنشى حاتتاما بويىنشا ەكى تاراپ بىتىمگەرشىلىككە كەلگەن. ال، تاعىلعان ەكىنشى ايىپ بويىنشا قايرات نۇرتاس سوت شەشىمىمەن 15 تاۋلىككە قاماۋعا الىندى. ءانشىنىڭ ايىپپۇل سالۋمەن شەكتەلۋ تۋرالى ءوتىنىشى قاناعاتتاندىرىلمادى. سەبەبى، سوت قۇقىق بۇزۋشىلىق اكىمشىلىك جازا قولدانىلعاننان كەيىن ءبىر جىل ىشىندە قايرات نۇرتاستىڭ بۇزاقىلىق ارەكەتى قايتادان قايتالانىپ وتىر. وسىلايشا، «مەن ورالام» دەپ ءان سالاتىن قايرات نۇرتاس 15 كۇننەن كەيىن جاقىندارىنا ورالاتىن بولدى.

بۇدان كەيىن تاعى ءبىر ەسترادا جۇلدىزى ءابدىجاپپار ءالقوجانىڭ 10 تاۋلىككە قاماۋعا الىنعانى بەلگىلى بولدى. بۇل تۋرالى الماتى وبلىستىق سوتىنىڭ تەلەگرام-ارناسىندا اقپارات جاريالاندى.

«6-شىلدە كۇنى قونايەۆ قالاسىنىڭ مامانداندىرىلعان اۋدانارالىق اكىمشىلىك قۇقىق بۇزۋشىلىقتار جونىندەگى سوتىندا ا. ب. -عا قاتىستى كولىك قۇرالىن باسقارۋ قۇقىعىنان ايىرىلعان جۇرگىزۋشىنىڭ كولىك قۇرالىن باسقارۋى دەرەگى بويىنشا اكىمشىلىك ءىس قارالدى. ءىس جاعدايلارىنان بەلگىلى بولعانداي، 2024 -جىلعى 5-شىلدەدە ساعات 23:50 شاماسىندا ا. ب.، كولىك قۇرالىن باسقارۋ قۇقىعىنان ايىرىلعان بولا تۇرا، قونايەۆ قالاسى، راۋان ىقشام اۋدانى، رەچنيكوۆايا كوشەسىندە ورنالاسقان دەمالىس ايماعىنىڭ جانىندا «Toyota Camry» ماركالى اۆتوكولىگىن باسقارعان، - دەپ جازىلعان سوت تاراتقان مالىمەتتە.

اتالعان ا ق ب ت ك-نىڭ 612-بابى 3-بولىگىنە سايكەس، بۇل قۇقىق بۇزۋشىلىق ءۇشىن جازا رەتىندە 50 ا ە ك مولشەرىندە ايىپپۇل سالۋ نەمەسە ون تاۋلىككە اكىمشىلىك قاماۋعا الۋ قاراستىرىلعان.

«سوت قاۋلىسىمەن ءانشى ا ق ب ت ك-نىڭ 612-بابى 3-بولىگى بويىنشا اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ، 10 تاۋلىككە اكىمشىلىك قاماۋعا الىندى»، - دەپ جازىلعان الماتى وبلىستىق سوتىنىڭ باسپا ءسوز قىزمەتى تاراتقان اقپاراتتا.

ارينە، از ۋاقىتتىڭ ىشىندە 3 بىردەي تانىمال ونەر يەسىنىڭ قاماۋعا الىنعانى جۇرت نازارىن اۋدارعانى راس. الەۋمەتتىك جەلى قولدانۋشىلارى «تەمىر توردىڭ ار جاعىندا ءبىر دوكەيدىڭ تۋعان كۇنى بولىپ جاتىر ما؟» دەپ ازىلدەپ جاتىر. ەندى ءبىرى بۇل وقيعالاردىڭ ساياسي استارى بار ەكەنىن ايتىپ، «جۇرت نازارىن اۋدارتۋعا ارنايى جاسالعان قادام» دەپ باعالاۋدا.

بۇل وقيعالارعا قاتىستى ق ر مادەنيەت جانە اقپارات ءمينيسترى ايدا بالايەۆا الەۋمەتتىك جەلىدە ارنايى جازبا قالدىردى.

«قۇرمەتتى دوستار! قوعامدى قارىشتاپ وسىرەتىن دە، تۇقىرتىپ وشىرەتىن دە - مادەنيەت. مادەنيەت تەك ونەر مەن ءبىلىم، وزات تالعام مەن تازالىك ەمەس. بۇل، ەڭ الدىمەن، ادامنىڭ ىشكى رۋحانياتى، حالىقتىڭ وركەنيەتتىك بولمىسى. ەندەشە، سول مادەنيەتتىڭ تۋىن كوتەرىپ، ونەردىڭ تاسىن ورگە دومالاتىپ جۇرگەن ءاربىر مايتالمان - ەلگە ۇلگى، قوعامعا باعدار بولۋى شارت. وكىنىشكە قاراي، كەيىنگى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتتى. ارينە، جەكە- دارا ادام رەتىندە، قاراپايىم ازامات رەتىندە كىمگە بولسا دا پەندەشىلىك ءتان قاسيەت. ادام بولعان سوڭ قاتەلەسۋىڭ مۇمكىن، ءبىراق ونىڭ ارتى زاڭدى اتتاۋعا بارماۋى ءتيىس. ءوزىن ناعىز «مادەنيەت قايراتكەرىمىن» دەيتىن جان ءۇشىن تانىمالدىق زاڭسىزدىققا جول بەرەتىن قۇدىرەت ەمەس. ولار قاشاندا ۇلت مادەنيەتى دامۋىنىڭ قوزعاۋشى كۇشى سانالادى. سوندىقتان ولاردىڭ كوپكە ىقپالى تەك ونەگە، ناسيحات، جاقسىلىققا ارقاۋ بولۋى كەرەك، دەپ جازدى ايدا بالايەۆا Facebook-تەگى پاراقشاسىندا.

ەستەرىڭىزگە سالساق، بۇعان دەيىن تانىمال ءانشى تورەعالي تورەالى اكىمشىلىك قۇقىق بۇزۋ تۋرالى كودەكستىڭ 613-بابى، 1-بولىگى (پوليتسيا قىزمەتكەرىنىڭ تالاپتارىن ورىنداماعانى ءۇشىن) بويىنشا قوسىمشا جاۋاپكەرشىلىككە تارتىلعان بولاتىن.

كەيىن سوت ۇكىمىمەن 40 ساعات قوعامدىق جۇمىسقا تارتىلعان ءانشىنىڭ الماتى قالاسىنداعى ساياباقتاردىڭ بىرىندە جۇمىس ىستەپ جاتقانى بەلگىلى بولدى.

اۆتور

ورالحان قوجانوۆ