تۇرسىنبەك قاباتوۆ قاماۋعا الىندى

استانا. KAZINFORM - ۇشاق بورتىندا ماس كۇيىندە ادەپسىز سوزدەر ايتقان ادام جازالاندى، - دەپ حابارلايدى Massaget.kz ءتىلشىسى.

استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىنا سايكەس، ايىپتالۋشى - ازىلكەش تۇرسىنبەك قاباتوۆ.

استانا قالالىق اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى ۇساق بۇزاقىلىق جاساعانى ءۇشىن ايىپتالعان ادامعا قاتىستى ءىستى قارادى (ا ق ب ت ك- ءنىڭ 434-بابىنىڭ 1-بولىگى).

ءىس ماتەريالدارىنا سايكەس، تۇرسىنبەك قاباتوۆ ۇشاق بورتىندا ماس كۇيىندە ادەپسىز سوزدەر ايتقان.

سوتتا قاباتوۆ ستيۋاردەسسالاردىڭ ناشار قىزمەتىنە كوڭىلى تولمايتىنىن ايتىپ، ولارعا ءوز ەسكەرتۋىن بىلدىرگەنى انىقتالدى. ول ءوزىنىڭ ادەپسىز ءسوز ايتقانى نەمەسە ايتپاعانى ەسىندە جوقتىعىن العا تارتقان، ءبىراق قوعامدىق ءتارتىپتى بۇزعانى ءۇشىن كەشىرىم سۇراعان.

كۋاگەر (اعا ستيۋاردەسسا) قاباتوۆتىڭ ۇشاق بورتىندا ماس كۇيىندە بولعانىن جانە ادەپسىز سوزدەر ايتىپ، سول ارقىلى قوعامدىق ءتارتىپ پەن ازاماتتاردىڭ تىنىشتىعىن بۇزعانىن راستاعان.

قۇقىق بۇزۋشىنىڭ كىناسى كۋانىڭ ايعاقتارىمەن، جولاۋشىنى پوليتسياعا بەرۋ اكتىسىمەن، بەينەجازبامەن جانە مەديتسينالىق ساراپتاما قورىتىندىسىمەن راستالادى.

ا ق ب ت ك- ءنىڭ 434-بابىنىڭ 1-بولىگىنىڭ سانكتسياسىندا 20 ا ە ك كولەمىندە ايىپپۇل سالۋ نەمەسە 5 تەن 15 تاۋلىككە دەيىن اكىمشىلىك قاماققا الۋ كوزدەلگەن.

سوت جاسالعان ءىس-ارەكەتتىڭ كولەمى مەن سيپاتىن، قوعامعا تەرىس اسەر ەتەتىن جانە قوعامدى سىيلاماۋشىلىقتى كورسەتۋگە باعىتتالعان، لايىقسىز مىنەز-قۇلىقپەن كورىنەتىن قۇقىققا قارسى مىنەز-قۇلىقتىڭ جالعاسۋىن ەسكەرە وتىرىپ جازا تاعايىندادى.

ايىپتالۋشى قاباتوۆ ا ق ب ت ك- ءنىڭ 434-بابىنىڭ 1-بولىگىندە كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلدى. ول اكىمشىلىك جازاعا تارتىلدى - 5 تاۋلىككە قاماۋعا الىندى.

قاۋلى زاڭدى كۇشىنە ەنگەن جوق.