تۇرمىسقا شىققان قىزدىڭ تەگىن اۋىستىرۋعا بولا ما - ق م د ب جاۋاپ بەردى
استانا. KAZINFORM - تۇرمىسقا شىققان ايەل ءوز اكەسىنىڭ اتىمەن اتالۋى ءتيىس، دەپ حابارلايدى ق م دب شاريعات جانە ءپاتۋا ءبولىمىنىڭ باسپا ءسوز قىزمەتى.

«اسىراندى بالالارىڭدى ءوز اكەلەرىنىڭ اتىمەن اتاڭدار. اللانىڭ قۇزىرىندا ەڭ دۇرىسى سول»، - دەپ بۇيىردى.
وسى اياتتى العا تارتىپ كەيبىر عالىمدار تۇرمىسقا شىققان قىزعا كۇيەۋىنىڭ تەگىنە وتۋگە تىيىم سالادى. ال كەيبىر عالىمدار ايەلدىڭ كۇيەۋىنىڭ فاميلياسىنا ءوتۋ عۇرىپتا قالىپتاسقان ءارى ەلگە تانىتۋ ماقساتى بولسا وقاسى جوق دەيدى. ويتكەنى قۇراندا: «نۇحتىڭ ايەلى جانە لۇتتىڭ ايەلى» دەپ ايەلدەردى كۇيەۋىنىڭ اتىمەن تانىتىپ تۇر.
ءابۋ ساعيد ءال-حۋدريدەن (اللا وعان رازى بولسىن) ريۋايات ەتىلگەن حاديستە: «ءماسعۋد ۇلىنىڭ ايەلى زەينەپ (اللا وعان رازى بولسىن) اللا ەلشىسىنە (وعان اللانىڭ سالاۋاتى مەن سالەمى بولسىن) كەلىپ (كىرۋگە) رۇقسات سۇرايدى. «ۋا اللانىڭ ەلشىسى! زەينەپ كىرۋگە رۇقسات سۇراپ تۇر!» - دەگەندە، ول: «قايسى زەينەپ؟»، - دەپ سۇرايدى. «ءماسعۋد ۇلىنىڭ ايەلى»، - دەپ جاۋاپ بەرەدى. ول: «كىرسىن» دەيدى. سوندا وعان كىرۋگە رۇقسات بەرەدى».
- سوندىقتان تۇرمىسقا شىققان ايەل ءوز اكەسىنىڭ اتىمەن اتالۋى ءتيىس. ونى وزگەرتۋ - حارام. ال كۇيەۋىنىڭ تەگىنە اۋىسۋىنىڭ وقاسى جوق، ءبىراق مىندەتتى ەمەس. كۇيەۋى دە ونى ءوز تەگىن الۋعا ماجبۇرلەۋى دۇرىس ەمەس، - دەپ ءمالىم ەتتى شاريعات جانە ءپاتۋا ءبولىمى.