تۇرمە ءتارتىبىن بۇزعاندار قانشا مەرزىمگە سوتتالادى
استانا. KAZINFORM - ىشكى ىستەر مينيسترلىگى قىلمىستىق اتقارۋ جۇيەسى كوميتەتىندەگىلەر تۇرمە رەجيمىن بۇزعاندار قانداي جازا ارقالايتىنىن ايتتى.
«قازىرگى تاڭدا جازاسىن وتەپ جاتقان تۇلعالاردىڭ نەگىزگى بولىگى قاماۋدا ۇستاۋدىڭ بەكىتىلگەن ءتارتىبىن ساقتايدى، ادال ەڭبەك ەتىپ، قايتا الەۋمەتتەندىرۋ باعدارلامالارىنا قاتىسادى، ءبىلىم الادى. ءبىر سوزبەن ايتقاندا، تۇزەلۋگە بەت الىپ، ەركىندىكتەگى قالىپتى ومىرگە ورالۋعا تالپىنادى. ءبىراق جاعىمسىز سيپاتى باسىم سانات تا بار. ولار ءۇشىن اباقتى قالىپتى ءومىر ءسۇرۋ ورتاسىنا اينالعان. وندايلاردىڭ ءارقايسىسى بىرنەشە رەت سوتتى بولعان جانە بۇلاردى زاڭدى ساقتاي وتىرىپ ءومىر سۇرۋگە باعىتتاۋ ايتارلىقتاي قيىن. ونىڭ ۇستىنە وزدەرىندە دە نيەت جوق. وكىنىشكە قاراي، تاربيەمەن ىقپال ەتۋگە باعىتتالعان شارالاردىڭ كوبى ولارعا سونشالىق اسەر ەتە المايدى»، - دەلىنگەن Kazinform ساۋالىنا جولدانعان جاۋابىندا.
جاۋاپتا زاڭناما بەكىتكەن رەجيمدى مويىندامايتىن، تۇزەتۋ مەكەمەسىندەگى احۋالدى تۇراقسىزداندىرۋعا تىرىساتىندار بار ەكەنى ايتىلعان.
«ونداي جاعدايلاردا مەكەمە اكىمشىسى سوت ورگاندارىنا ءتيىستى ماتەريالداردى جولدايدى. قىلمىستىق كودەكستە ونداي ارەكەت ءۇشىن 3 جىلعا دەيىن باس بوستاندىعىنان ايىرۋ جازاسى كوزدەلگەن. ال ارەكەت توپپەن جاسالسا، 5 جىلدان 10 جىلعا دەيىن باس بوستاندىعىنان ايرىلادى»، - دەپ جازىلعان جاۋاپتا.
