تۇرمەگە اتتاپ كىرگەننەن-اق توبەڭنەن بىرەۋ ءتونىپ تۇرعانداي سەزىلەدى - «قارا بۇركىتتىڭ» كەزەكشىسى

اقتوبەلىك دانيار دوستانعالي ۇلىنىڭ قوستاناي وبلىسى ءجىتىقارا اۋدانىنا قاراستى ءجىتىقارا قالاشىعىنا كوشىپ كەلگەنىنە ون جىلدىڭ ءجۇزى بولعان.

«ءوزىم اقتوبەنىڭ العا دەگەن اۋدانىنانمىن. 200 شاقىرىم جەردەگى جەم قالاسىندا جۇمىس ىستەدىم. ول جاقتا تىرشىلىك ەتۋ قيىنداۋ، تۇرعىننىڭ كوبىسى كۇنكورىس قامىمەن كوشىپ كەتكەن. ءبىز دە جۇمىس بابىمەن قوستاناي وبلىسىنا اۋىستىق» دەگەن ول وسى جاققا كەلىسىمەن «قارا بۇركىت» تۇرمەسىنە جۇمىسقا ورنالاسقان.

ايتۋىنشا، وندا 2014-جىلدان باستاپ جۇمىس ىستەيدى. وعان دەيىن قۇسمۇرىنداعى كولونيادا جابىلعانعا دەيىن ىستەگەن. ونىڭ وسى سالاداعى جۇمىس ءوتىلى 20 جىلدان اسقان. بۇگىندە ول - مەكەمە باستىعىنىڭ كەزەكشى كومەكشىسى.

- مەكەمە باستىعى ورنىندا بولماعان كەزدە تۇرمەگە تولىقتاي ءبىز جاۋاپتىمىز. وسىنداي ەڭ جاۋاپتى ءىس ءبىزدىڭ مويىنعا جۇكتەلگەن. كەزەكشىلىك كەزىندە مەكەمەدەگى بولىپ جاتقان ءىس-ارەكەتتىڭ ءبارىن باقىلاۋدا ۇستايمىز، - دەگەن دانيار دوستانعالي ۇلى تۇرمە ىشىندە كەزەك كۇتتىرمەستەن، شۇعىل تۇردە شەشۋدى قاجەت ەتەتىن جاعدايدىڭ بولا بەرمەيتىنىن ءسوز ەتتى.

- قۇداي ساقتاسىن، ونداي جاعداي بولمادى. بىردە قاتتى جەل سوعىپ، قۇيىنداتقان كەزدە كەنەتتەن جارىق ءسونىپ قالدى. ال بىزگە جارىق جۇيەسى كراسنوارمەيسك اۋىلىنان تارتىلعان. مىنە، توك اجىراتقىش پودستانساسى سول جاقتا عانا. ءتۇن ورتاسىندا بۇكىل مەكەمەدە 5-10 مينۋتتاي جارىق بولماي قالادى. سونداي كەزدە تەز ارادا شەشىم قابىلداپ، ارەكەت ەتىپ، كۇزەت كۇشەيتىلىپ، قوسىمشا كۇزەتتەگىلەر كەزەككە تۇرعىزىلادى. «ساقتىقتا قورلىق جوق» دەمەكشى، كەز كەلگەن نارسەگە ءبىز دايىن بولۋىمىز ءتيىس، - دەدى ول.

كەزەكشىلىك قىزمەتتىڭ وتىمەن كىرىپ، كۇلىمەن شىعىپ جۇرگەن دانيار دوستانعالي ۇلى ءوزىن باسقا سالادا كورە المايتىنىن ايتتى. «وسى سالادا جۇمىس ىستەپ جۇرگەنىمىزگە 20 جىلدان استى. بويىمىز وسىعان ۇيرەنىپ كەتتى. ءتىپتى، باسقا سالادا ءوزىمدى كورە المايمىن. ەڭبەك دەمالىسىنا شىققاندا قالاي بولاتىنىن كىم ءبىلسىن؟! ءوزىمنىڭ اكەم شوپىر بولعان جان. سوندىقتان كوز اشقالى تەمىر-تەرسەكتىڭ ورتاسىندا وستىك. ول كىسى قولى قالت ەتسە كولىك جوندەيتىن. «سىنىقتان باسقاسىنىڭ ءبارى جۇعادى» دەگەندەي تەحنيكادان باس كوتەرمەيتىن قاسيەت مەندە دە بار. كىم بىلەدى، زەينەتكە شىققاندا كولىك جوندەيتىن تۇراق اشاتىن شىعارمىن»، - دەيدى «قارا بۇركىت» كەزەكشىسى.

- كەزەكشىلىككە تۇسكەندە ءبىر تاۋلىك ىستەپ، ءۇش تاۋلىك دەمالىس بەرىلەدى. سول كەزەكشىلىكتە تىنىعىپ الۋعا 4-5 ساعات بەرىلەدى. شىنى كەرەك، ۇيدەگىدەي ەركىن جۇرە المايسىڭ. ءتۇن ورتاسىندا كوز ىلە المايسىڭ. كوز شىرىمىن الساڭ دا ۇيىقتاعانداي بولمايسىڭ. ال ۇيدە ءبىر ساعاتقا كوزىڭ ءىلىنىپ كەتسە، كادىمگىدەي تىنىعىپ قالاسىڭ. ءبىراق اۋرۋ قالسا دا ادەت قالمايدى عوي، ۇيدە بولساڭ دا ءاربىر قىبىر-سىبىردىڭ بارىنە قۇلاق ءتۇرىپ، ساق جاتاسىڭ. سىرتتا بىردەڭە تىرس ەتە قالسا، ويانىپ كەتەسىڭ، - دەيدى دانيار دوستانعالي ۇلى.

ايتۋىنشا، الدىنا كەلگەن ءاربىر قىلمىسكەر، ەڭ الدىمەن ادام بالاسى. تارتىلعان جازاسىنا قاراماستان، ءتارتىپ ساقتاپ، زاڭ بويىنشا ەشقانداي كۇش قولدانىلمايتىنىن ءسوز ەتتى.

- ءومىردىڭ ءمانى - ادامشىلىقتا. ەگەر ادامدار ءبىرىن-ءبىرى الداماي، ءبىر-بىرىنە سەنىممەن قاراسا، ەلدە دە تىنىشتىق بولادى. سوتتالعاننىڭ جاسى كىشى بولسا دا «ءسىز»، «ءبىز» دەپ سويلەسىپ، سىيلاستىقتى ساقتايمىز. ونىڭ ۇستىنە، تاجىريبەمەن الدىڭا كەلگەننىڭ شىن-وتىرىگىن اجىراتا الامىز. ولار دا وسى شەكارادان شىقپاۋعا تىرىسادى، - دەگەن كەزەكشى دانيار دوستانعالي ۇلى كەلەشەكتە بالالارىنىڭ وسى سالاعا كەلۋىنە قارسى ەمەسىن جەتكىزدى. - «بالالارىمنىڭ وسى سالادا جۇمىس ىستەۋىنە قارسى ەمەسپىن. شىنىن ايتقاندا، قازىر مەملەكەت تاراپىنان اسكەري قىزمەتكەرلەردىڭ جاعدايىن باستى نازاردا ۇستاپ، بارىنشا جاقسارتىپ جاتىر. وسى سالاعا كەلگەنىمە وكىنبەيمىن. جۇرگەن جەرىمدە جاستاردى وسى سالاعا كەلۋىنە ۇگىتتەپ جۇرەمىن»، - دەيدى ول.

بۇگىندە دانيار دوستانعالي ۇلى التى بالانىڭ اكەسى. ءۇيدىڭ تۇڭعىشى وردابۇزار جاستا 21 گە تولدى. «بۇيىرتسا، جەتىنشى نارەستەمىزدى كۇتىپ وتىرمىز. اراسىندا اناسى شىعا الماعاندا، ولاردىڭ ساباعىنا قاتىسىپ، مەكتەپتەگى ءىس-شارالارىنا ارالاسىپ تۇرامىن»، - دەدى «قارا بۇركىت» كەزەكشىسى.

aikyn.kz