تۇركىستاندا تۋريستىك جاڭا ماۋسىم اشىلدى
تۇركىستان. KAZINFORM - «تۇركىستان - تۇركى الەمىنىڭ تۋريستىك استاناسى» اياسىندا 100 دەن استام ءىس شارا وتەدى.
بۇگىن «تۇركىستان - تۇركى الەمىنىڭ تۋريستىك استاناسى» اتاۋىمەن تۋريستىك جاڭا ماۋسىم اشىلدى. «كەرۋەن ساراي» كەشەنىندە ۇيىمداستىرىلعان سالتاناتتى ءىس-شاراعا تۇركىستان وبلىسىنىڭ اكىمى دارحان ساتىبالدى قاتىسىپ، تۇركىستاندىقتار مەن قوناقتاردى ناۋرىز مەرەكەسىمەن جانە وسىناۋ ايتۋلى ساتپەن قۇتتىقتادى.
«ءبىز تۋريزم سالاسىن دامىتۋدى تۇركىستاننىڭ نەگىزگى باعىتتارىنىڭ بىرىنە اينالدىرامىز. ەل پرەزيدەنتى قاسىم- جومارت كەمەل ۇلى تۋريزم سالاسىن ەلدىڭ ەكونوميكالىق ءوسۋ درايۆەرلەرىنىڭ بىرىنە اينالدىرۋ جونىندە ناقتى مىندەت قويدى. بۇل رەتتە تۇركىستان وبلىسىنىڭ تۋريزم سالاسىنداعى الەۋەتى وتە جوعارى. وتكەن جىلى تۇركىستان وبلىسىنا كەلگەن شەتەلدىك تۋريستەر سانى 15 مىڭعا جەتتى. ال، ءبىر كۇندىك كەلۋشىلەر سانى 1 ميلليون ادامعا جۋىقتادى. تۋريزم سالاسىن دامىتۋ ماقساتىندا تۇركىستانداعى اۋەجايدا حالىقارالىق اۋە رەيستەرىنىڭ سانىن كوبەيتۋدەمىز. الەمنىڭ باسقا دا قالالارىنان تۇركىستان قالاسىنا جاڭا اۋە باعىتتارىن اشۋدى وسى جىلى دا جالعاستىرامىز»، - دەدى دارحان ساتىبالدى.
كيەلى قالاعا «تۇركى الەمىنىڭ 2024 -جىلعى تۋريستىك استاناسى» مارتەبەسىنىڭ بەرىلۋى - تاريحي شاھاردىڭ تۇركى ەلدەرىنىڭ اراسىندا الاتىن ورنىنىڭ جوعارى ەكەنىن بىلدىرەدى. بيىل وڭىردە حالىقارالىق دەڭگەيدە - 25، رەسپۋبليكالىق دەڭگەيدە - 23، وبلىستىق دەڭگەيدە - 56، جالپى 100 دەن استام ءىس-شارا وتكىزۋ جوسپارلانىپ وتىر. بۇل ستاتۋس - تەك تۋريزم سالاسىنىڭ ىلگەرىلەۋىنە عانا ەمەس، تۋريستەردىڭ جەرگىلىكتى جەردىڭ رۋحانياتى جانە مادەنيەتىمەن تانىسۋىنا، كاسىپكەرلىك پەن ەكونوميكانىڭ دا دامۋىنا زور ۇلەسىن قوساتىن اۋقىمى كەڭ، ماڭىزى تەرەڭ وقيعا.
تۇركىستان قالاسىندا جاڭا تۋريستىك ماۋسىمىنىڭ اشىلۋىنا ارنالعان بىرنەشە ءىس- شارا ۇيىمداستىرىلدى. الدىمەن كەلۋشىلەر تۇركىستان ءوڭىرىنىڭ تۋريزم باعىتى بويىنشا اقپاراتتىق ستەندتەرمەن تانىسىپ، قىزىقتى مالىمەتتەرگە قانىقتى. سونىمەن قاتار ۇلتتىق بولمىس ناسيحاتتالىپ، وبلىستىڭ تۋريستىك الەۋەتى كورسەتىلدى. اتاپ ايتقاندا، قول كۇرەسى، گىر تاسىن كوتەرۋ، كەۋدە تارتىلىسى، تاعى باسقا ۇلتتىق سپورت تۇرلەرىنەن جارىستار، «Bauyrsak Fest» جانە «قىمىز ءىشۋ» ويىن-ساۋىق سايىستارى ۇيىمداستىرىلدى. بايقاۋ جەڭىمپازدارىنا سەرتيفيكاتتار تابىستالدى. ەرەكشە شوۋ مەن قىزىقتى باعدارلامادان بولەك سۋرەتكە تۇسۋگە ارنالعان كرەاتيۆتى فوتوزونالار قاراستىرىلعان.
وبلىستىڭ ونەر ۇجىمدارى مەن فولكلورلىق انسامبلدەرى، ءبي توپتارى، سيرك ارتىستەرى، ناۋرىز مەيرامىنا ارنالعان تەاترلاندىرىلعان قويىلىمدار، ۇلتتىق ءداستۇردى تانىتاتىن الىپ باتىرلار كورەرمەندەرگە كوتەرىڭكى كوڭىل- كۇي سىيلادى. قولونەرشىلەر جارمەڭكەسىنە قازاقى ناقىشتاعى بۇيىمدار قويىلدى. باعدارلاما «Fire Show» فورماتىندا وتشاشۋ شوۋىنا ۇلاستى.
