تۇركىستاندا كوميسسيا وتىرىسى كەزىندە اكىمدىك قىزمەتكەرى بالاباقشا يەسىنە قول كوتەرگەن

تۇركىستان. KAZINFORM - تۇركىستان وبلىستىق ءبىلىم باسقارماسىندا وتكەن كوميسسيا وتىرىسىندا بالاباقشا يەسىنە كۇش قولدانعان. بۇل ءساتتىڭ ۆيدەوسى وتىرىستىڭ ءتۇسىرىلىمى كەزىندە ءتۇسىپ قالعان. بۇل تۋرالى Otyrar.kz جازدى.

بەينەجازبانى تۇركىستان قالالىق ءماسليحات دەپۋتاتى ساكەن حانديللايەۆ Facebook پاراقشاسىندا جاريالادى.

«اكىمدىكتەن پانا، كومەك سۇراپ كەلگەن حالىق كەلىپ، تاياق جەپ كەتىپ جاتسا، «مەملەكەتتىك قىزمەت تۋرالى» زاڭ بۇعان نە دەيدى؟ ق ر مەملەكەتتىك قىزمەت ىستەرى اگەنتتىگى بۇعان نە دەيدى، الدە مەملەكەتتىك قىزمەتكەرلەرگە ارنالعان زاڭ تەك اۋداندار مەن اۋىل اكىمشىلىكتەرىندە قىزمەت جاسايتىن ءجاي ماماندارعا عانا قولدانىلادى ما؟»، - دەپ جازدى اۆتور.

بۇل جايت وبلىستىق ءبىلىم باسقارماسىندا وتكەن بالاباقشالار جونىندەگى كوميسسيا وتىرىسى كەزىندە بولعان. سوققىعا جىعىلدىم دەگەن ايەل بالاباقشا يەسى ەكەن. وتىرىس كەزىندە ايەل ازاماتتارى اراسىندا جانجال تۋىنداعان. ۆيدەودان اكىمدىك قىزمەتكەرىنىڭ بالاباقشا يەسىنە اشۋلانىپ، كەيىن جۇلقىلاپ، قول كوتەرگەنىن كورۋگە بولادى.

«سوڭعى ءۇش-ءتورت جىلدان بەرى ايەلدەرگە قاتىستى زورلىق زومبىلىق جاساعاندارعا قارسى زاڭداردى قاتاڭداتۋ بويىنشا مەملەكەتتىك دەڭگەيدە تالقىلانۋلار بولىپ، ناتيجەسىندە زاڭعا قول قويىلىپ، بەكىتىلدى. ول زاڭعا سايكەس، ايەلدەرگە قول كوتەرگەنى ءۇشىن 3- 8 جىل ارالىعىندا قىلمىستىق جاۋاپكەرشىلىككە دەيىن تارتىلاتىن سەكىلدى. ال وسىنداي ايەل كىسىنى، مەملەكەتتىك ورگاننىڭ ىشىندە، مەملەكەتتىك قىزمەتكەر ءدۇيىم جۇرتتىڭ كوز الدىندا ۇرىپ-سوعىپ جىبەرگەنى ءۇشىن سوت 10 ا ە ك كولەمىندە ايىپپۇل قارايدى ەكەن. ال وسى ايەل كىسى وتباسىندا وسىنداي شاپالاق جەسە، كۇيەۋى 20 تاۋلىككە قامالار ەدى. وسىنداي جاعدايلارعا قاراپ، مەملەكەتتىك قىزمەتكەرگە ايەلدەردى ۇرۋعا ارتىقشىلىقتار بەرىلگەن بە دەگەن وي كەلەدى»، - دەپ جازدى ءماسليحات دەپۋتاتى ساكەن حانديللايەۆ.

بالاباقشا يەسى اكىمدىك قىزمەتكەرىنىڭ ۇستىنە ارىزدانعان. وبلىستىق پوليتسيا دەپارتامەنتىنىڭ مالىمەتىنشە، ارىز اكىمشىلىك قۇقىق بۇزۋشىلىق تۋرالى كودەكستىڭ 73-2-بابى 1-تارماعى (ۇرىپ-سوعۋ) بويىنشا تىركەلىپ، ءىس ماتەريالدارى سوتقا جولدانعان.

جوعارعى سوتتىڭ رەسمي سايتىنداعى مالىمەتكە سۇيەنسەك، اتالعان ءىس تۇركىستان قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا قارالعان. سوت قاۋلىسىمەن اكىمدىك قىزمەتكەرىنە 10 ايلىق ەسەپتىك كورسەتكىش مولشەرىندە ايىپپۇل سالىنعان.

تۇركىستان وبلىستىق اكىمدىگىندەگىلەر بالاباقشا يەسىنە كۇش قولدانعان ايەل اكىمدىكتىڭ ىشكى اۋديت قىزمەتىنىڭ باس ينسپەكتورى ەكەنىن ايتتى. اتالعان وقيعادان كەيىن قىزمەتكەردەن تۇسىنىكتەمە الىنىپ، ادەپ نورمالارىن ساقتاماعانى ءۇشىن وعان قاتاڭ سوگىس بەرىلىپتى.