تۇركىستاندا جەرورتا تەڭىزىنەن جەتكىزىلگەن وسىمدىكتەر وسەدى
تۇركىستان. KAZINFORM - تۇركىستاندا بوتانيكالىق باعى بار «جاستار» ساياباعى اشىلدى.
ساياباق ىشىندەگى جابىق جىلىجايدا ءارتۇرلى قۇرلىقتان جەتكىزىلگەن وسىمدىكتەردىڭ 70 كە جۋىق ءتۇرى وسىرىلەدى. ولاردىڭ ىشىندە جەرورتا تەڭىزى، لاتىن امەريكاسى، ەۋروپا، وڭتۇستىك شىعىس ازيا جانە تاعى باسقا ايماقتاردىڭ وسىمدىكتەرى بار.
سونداي- اق، پالما، فيكۋس، تروپيكالىق، ءشول، سۋبتروپيكتىك، تسيترۋس وسىمدىكتەرىمەن قامتىلعان. ساياباقتا قۇستار مەن بالىقتار دا بار.
سونىمەن قاتار، مۇندا مەكتەپ وقۋشىلارىنا بيولوگيا ساباقتارىن ءوتۋ مۇمكىندىگى قاراستىرىلعان.
ساياباقتىڭ جالپى الاڭى - 10,5 گا اۋماقتى الىپ جاتىر. دەمالىس ايماعىندا سكەيتبورد الاڭدارى، شاحمات كلۋبى، وزگە دە ويىن الاڭدارى، بۇدان بولەك، 2 شاقىرىم جۇگىرۋ جولى جانە ۆەلوجولدار ورناتىلعان.
جاڭا ساياباقتىڭ اشىلۋ سالتاناتىنا قاتىسقان وبلىس اكىمى دارحان ساتىبالدى قالا تۇرعىندارى مەن قوناقتارىن الدا كەلە جاتقان ەلىمىزدىڭ تاۋەلسىزدىك كۇنى مەرەكەسىمەن قۇتتىقتادى.
- وزدەرىڭىزگە ءمالىم، وسىدان 6 جىل بۇرىن جاڭا تۇركىستان وبلىسى قۇرىلدى. بۇگىندە تۇركىستان تەك وبلىس ورتالىعى رەتىندە عانا ەمەس، تۇركى الەمىنىڭ رۋحاني مادەني ورتالىعى بولىپ قالىپتاستى. ءتۇرلى نىساندار بوي كوتەرىپ، شىن مانىندەگى ينفراقۇرىلىمى قالىپتاسقان جاڭا ساۋلەتتى قالاعا اينالدى. قالانى اباتتاندىرۋ جانە قالا تۇرعىندارى مەن قوناقتارى ءۇشىن سەرۋەندەۋگە قولايلى جاعداي جاساۋ، سونداي- اق تۇركىستان قالاسىندا جاسىل جەلەكتەر القابىن ۇلعايتۋ ماقساتىندا ناقتى جۇمىستار اتقارىلۋدا، - دەدى وبلىس اكىمى دارحان ساتىبالدى.
ءىس- شاراعا ەلىمىزگە تانىمال ونەر جۇلدىزدارى - مادينا ءسادۋاقاسوۆا، عازيزحان شەكەربەكوۆ، ماحمۋد ۋريمبايەۆ قاتىسىپ، ونەر كورسەتتى.
