تۇركىستان وبلىسىندا ونكولوگيالىق ەسەپتە تۇرۋشىلار سانى 10 مىڭنان استى

تۇركىستان. KAZINFORM - تۇركىستان وبلىسىندا قاتەرلى ىسىكپەن ناۋقاستانۋشىلار كوبەيگەن. بۇل تۋرالى تۇركىستان وبلىسى دەنساۋلىق ساقتاۋ باسقارماسىنىڭ شتاتتان تىس باس دارىگەر- ونكولوگى باۋىرجان بەرتايەۆ مالىمدەدى.

بۇگىنگى كۇنى وبلىستىق ونكولوگيالىق ورتالىقتا 10010 ناۋقاس ديسپانسەرلىك ەسەپتە تۇرادى. بۇل كورسەتكىشتى وتكەن جىلدارمەن سالىستىرار بولساق، 6 پايىزعا وسكەنىن كورەمىز.

دارىگەرلەردىڭ ايتۋىنشا، قاتەرلى ىسىككە شالدىققاندار ىشىندە ءسۇت بەزى جانە وكپە وبىرى، جاتىر موينى قاتەرلى ىسىگى، توق ىشەك وبىرى ءجيى كەزدەسەدى. اتالعان دەرتتىڭ الدىنۋ الۋ باعىتىندا تۇركىستان وبلىستىق ونكولوگيالىق ورتالىقتا جانە اۋداندىق ەمحانالاردا 3-اقپاننان باستاپ اي سوڭىنا دەيىن اشىق ەسىك كۇندەرى ۇيىمداستىرىلۋدا. وندا دارىگەرلەر تۇرعىندارعا اقىسىز تەكسەرۋ جۇرگىزىپ، كەڭەس بەرىپ جاتىر.

«تۇركىستان وبلىسىندا 2023 -جىلى قاتەرلى ىسىكتەردى ەرتە انىقتاۋ بويىنشا جالپى سكرينينگتىك جوسپار 100 پايىزعا ورىندالدى. قاتەرلى ىسىكتىڭ الدىن الۋ ءۇشىن سكرينينگكە كوپشىلىك ءمان بەرمەيدى. ەگەر دەر كەزىندە ۋاقىتىلى تەكسەرۋدەن ءوتىپ، ەم الاتىن بولسا قاتەرلى ىسىكتى ەمدەۋ كورسەتكىشى جوعارى بولادى. سوندىقتان بارشا وبلىس تۇرعىندارىن اشىق ەسىك كۇنىندە بەلسەندى بولۋعا شاقىرامىز. ەمدىك شاراعا كەز-كەلگەن تۇركىستان وبلىسىنىڭ ازاماتتارى مەن قوناقتارى جولداماسىز، تەگىن، الەۋمەتتىك ساقتاندىرۋسىز جۇگىنە الادى»، - دەدى باۋىرجان بەرتايەۆ.

 

اۆتور
قايرات زاينيشەۆ