تۇركىستان وبلىسىندا سەلفي جاسايمىن دەپ سۋعا باتىپ كەتكەن قىزدىڭ ءمايىتى تابىلدى

تۇركىستان. KAZINFORM - جاس ءوسپىرىم فوتوسەسسيا جاساۋ كەزىندە ابايسىزدا سايرام سۋ وزەنىنە قۇلاپ كەتكەن. قۇتقارۋشىلار قىزدىڭ دەنەسىن ساعات 16:10-دا سۋدان شىعارىپ، پوليتسيا قىزمەتكەرلەرىنە تاپسىردى.

وقيعا قاسقاسۋ اۋىلىنان 15 شاقىرىم جەردەگى «سايرام- وگەم» ۇلتتىق پاركىنىڭ اۋماعىندا بولدى. دوستارىنىڭ ايتۋىنشا، جاس ءوسپىرىم فوتوسەسسيا جاساۋ كەزىندە ابايسىزدا سايرام وزەنىنە قۇلاپ كەتكەن.

ىزدەستىرۋ-قۇتقارۋ جۇمىستارىنا تۇركىستان وبلىسى ت ج د-نىڭ 54 قىزمەتكەرى، 1 ءجۇزۋ قۇرالى جانە 4 تەحنيكاسى جۇمىلدىرىلدى. سونداي-اق، تۇركىستان وبلىسى پوليتسيا دەپارتامەنتىنىڭ 6 قىزمەتكەرى مەن 3 تەحنيكاسى جانە جەرگىلىكتى اتقارۋشى ورگانداردان 11 ادام ىزدەۋ جۇمىستارىن جۇرگىزدى.

«بۇگىنگى ىزدەستىرۋ جۇمىستارى تولەبي اۋدانىندا ساعات 16:00-دا باستالدى. سودان 16:10 شاماسىندا جاس ءوسپىرىم قىزدىڭ دەنەسى سايرام سۋ وزەنىنەن تابىلدى. ءمايىتتى پوليتسيا قىزمەتكەرلەرىنە تابىستادىق. ازاماتتاردى سۋداعى قاۋىپسىزدىك ەرەجەلەرىن قاتاڭ ساقتاۋعا شاقىرامىز»، - دەدى تۇركىستان وبلىسى توتەنشە جاعدايلار دەپارتامەنتى باستىعىنىڭ ورىنباسارى اسحات ەرجانوۆ.

كەشە تۇركىستان وبلىسىندا جاس ءوسپىرىم فوتوسەسسيا جاساۋ كەزىندە ابايسىزدا وزەنگە قۇلاپ، سۋعا باتىپ كەتكەنى تۋرالى حابارلاعان ەدىك.

ايتا كەتەيىك، شىلدەنىڭ باسىندا حابارلاعانىمىزداي، شومىلۋ ماۋسىمى باستالعالى ەلىمىزدە 70 ادام سۋعا كەتىپ مەرت بولعان.

اۆتور
قايرات زاينيشەۆ