تۇركىستان وبلىسىندا قىزعالداق جۇلعان بويجەتكەن جاۋاپقا تارتىلاتىن بولدى
تۇركىستان. قازاقپارات - 22 جاستاعى قىز ءوزى جۇلعان قىزعالداقپەن سۋرەتكە ءتۇسىپ، ونى جەلىگە جۇكتەگەن.
پوليتسيا قىزمەتكەرلەرى «گرەيگ» قىزعالداقتارىن جۇلعان ورداباسىلىق تۇرعىندى الەۋمەتتىك جەلىلەر ارقىلى انىقتادى. ول ۇيالىجار اۋىلدىق وكرۋگىندەگى القاپتا قىزىل كىتاپقا ەنگەن گۇلدەردى جۇلىپ، بەينەجازبا ءتۇسىرىپ، جەلىدەگى پاراقشاسىنا جاريالاعان.
اتالعان جاعداي سيرەك كەزدەسەتىن جانە جويىلىپ كەتۋ قاۋپى تونگەن وسىمدىك تۇرلەرىمەن زاڭسىز اينالىسۋ فاكتىسى بويىنشا پوليتسيا بولىمىندە تىركەلدى.
«بارلىق جاعداي انىقتالىپ جاتىر. تۇركىستان وبلىسىنىڭ پوليتسياسى «گرەيگ» قىزعالداقتارىن تاماشالاۋعا كەلگەن تۇرعىندار مەن قوناقتارعا قىزىل كىتاپقا ەنگەن وسىمدىكتەردى جۇلعانى ءۇشىن زاڭدا جاۋاپكەرشىلىك قاراستىرىلعانىن ەسكە سالادى»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.
اۆتور
قايرات زاينيشەۆ
