تۇركىستان وبلىسىندا ناۋرىز مەيرامى 10 كۇن بويى تويلانادى
تۇركىستان. KAZINFORM - تۇركىستان وبلىسىندا بيىل ناۋرىز مەيرامىن 10 كۇن بويى تويلاۋ جوسپارلانىپ وتىر. بۇل تۋرالى بريفينگتە تۇركىستان وبلىسى مادەنيەت جانە تۋريزم باسقارماسىنىڭ باسشىسى ءازىمحان قويلىبايەۆ مالىمدەدى.
«ونىڭ ايتۋىنشا، بۇل حالقىمىزدىڭ ەجەلدەن كەلە جاتقان اتا ءداستۇرى. 14-23- ناۋرىز كۇندەرى ارالىعىندا «كورىسۋ كۇنى - امال مەرەكەسى»، «مەيىرىمدىلىك مەرەكەسى» سىندى اتاۋلى كۇندەرى ءتۇرلى شارالار وتەدى.
«14- ناۋرىز - «كورىسۋ كۇنى - امال مەرەكەسى» كۇنى وڭىردەگى بەلگىلى ونەر، سپورت سالاسىنداعى قايراتكەرلەر اعا بۋىننىڭ شاڭىراقتارىنا ارنايى بارىپ، جىلدىڭ باستالۋىمەن قۇتتىقتايدى. امانداندىق سۇراسىپ، كورىسەدى. سونداي-اق، وسى كۇنى «ناۋرىز - جاقسىلىقتىڭ جارشىسى» اتاۋىمەن وبلىستىق چەللەنج ۇيىمداستىرىلادى. ال 15- ناۋرىز كۇنى «ناۋرىز - مەيىرىمدىلىك مەرەكەسى» رەتىندە اتالىپ وتپەك. بۇل كۇنى اۋدان-قالالاردا، اۋىلداردا جاعدايى تومەن وتباسىلارعا، مۇمكىندىگى شەكتەۋلى ازاماتتارعا كومەك كورسەتۋ ماقساتىندا قايىرىمدىلىق اكتسياسى وتەدى. سونداي-اق، سوعىس، ەڭبەك ارداگەرلەرىنە، باتىر انالارعا قۇرمەت كورسەتۋ ماقساتىندا اعا ۇرپاقتى قاستەرلەيىك» اكسياسى قولعا الىنادى» - دەدى باسقارما باسشىسى.
سونىمەن قاتار، 15- ناۋرىز كۇنى - تۇركىستان قالاسىنداعى «كونگرەسس حولل» كەشەنىندە وبلىس اكىمدىگى مەن ايتىس اقىندارى جانە جىرشى-تەرمەشىلەردىڭ حالىقارالىق وداعىنىڭ ۇيىمداستىرۋىمەن تۇركىستان وبلىسى مەن جامبىل وبلىسى اقىندارى، تەرمەشى-جىرشىلارى اراسىنداعى كوماندالىق ونەر دوداسى ۇيىمداستىرىلادى.
بۇل تۋرالى بريفينگتە «ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ» تۇركىستان وبلىسىنداعى فيليال ءتوراعاسى تۇرار تىلەۋليەۆ ايتتى.
«16- ناۋرىز كۇنى «ناۋرىز - سالت-ءداستۇردىڭ جاڭعىرۋى» دەگەن باستامامەن وبلىستاعى بارلىق مادەنيەت مەكەمەلەرىندە ۇلتتىق سالت-داستۇرلەردى جاڭعىرتاتىن ساحنالىق كورىنىستەر وتەدى. ال 17- ناۋرىز كۇنى «ناۋرىز - تاربيەنىڭ باستاۋى» دەگەن اتاۋمەن بارلىق مەكتەپتەردە مەرەكەلىك ءىس-شارالار، قولونەر شەبەرلەرى مەن سۋرەتشىلەردىڭ كورمەلەرى ۇيىمداستىرىلادى. سونداي-اق، جاعدايى تومەن وتباسىلاردىڭ بالالارىنا، مۇمكىندىگى شەكتەۋلى بالالارعا كومەك كورسەتىلمەك. 18 ناۋرىز - «تۇركىستان - تۇركى الەمىنىڭ تۋريستىك استاناسى» دەگەن اتپەن 09:00 دەن باستاپ تۇركىستان وبلىسىنىڭ مەملەكەتتىك قىزمەتشىلەرى ۇلتتىق كيىم كيۋ چەللەنجىن باستايدى. سونىمەن قاتار، 18 ناۋرىز كۇنى «تۇركىستان - تۇركى الەمىنىڭ تۋريستىك استاناسى» اتانۋىنىڭ رەسمي اشىلۋ سالتاناتى «كەرۋەن ساراي» اۋماعىندا وتەدى»، - دەدى ءازىمحان سەرىك ۇلى.
بريفينگكە قاتىسقان تۇركىستان وبلىسى مادەنيەت جانە حالىق شىعارماشىلىعى ورتالىعىنىڭ ديرەكتورى مەيىرجان الياكباروۆ 19- ناۋرىز كۇنى - «ناۋرىز - جاڭارۋ مەن جاڭعىرۋدىڭ، تاتۋلىقتىڭ باستاۋى» دەگەن اتپەن بارلىق وڭىرلەردە اعاش ەگۋ ءداستۇرى قولعا الىناتىنىن ايتتى. بۇل كۇنگى مەرەكەلىك ءىس-شارالار «ناۋرىز باتا» داستۇرىمەن قورىتىندىلانادى.
«20- ناۋرىز - «ۇلتتىق سپورتتى ۇلىقتاۋ» كۇنىندە بارلىق وڭىرلەردەگى سپورت كەشەندەرى مەن اتشابارلاردا ۇلتتىق سپورت تۇرلەرىنەن جارىستار وتەدى. ال 21- ناۋرىز «قوش كەلدىڭ - ءاز ناۋرىز!» دەگەن اتاۋمەن تۇركىستان قالاسىنداعى «كەرۋەن» سارايى اۋماعىندا وبلىس اكىمىنىڭ قاتىسۋىمەن مەرەكەلىك سالتاناتتى ءىس-شارا جوسپارلانىپ وتىر. 22- ناۋرىز «ۇلىستىڭ ۇلى كۇنى - ءاز ناۋرىز» كۇنى تۇركىستان قالاسى مەن بارلىق اۋدان-قالالارداعى ورتالىق الاڭدار مەن ساياباقتاردا كورمەلەر، كونسەرتتىك باعدارلامالار، ۇلتتىق سپورتتىق ويىندار مەرەكە كوركىن قىزدىرادى. ال 23- ناۋرىز «ناۋرىز - تازالىقتىڭ ايناسى» كۇنى وبلىس كولەمىندە جالپى حالىقتىق سەنبىلىك ۇيىمداستىرىلىپ، اۋداندار مەن قالالاردا تازالىق جۇمىستارى جۇرگىزىلەدى»، - دەدى مەيىرجان نۇرعالي ۇلى.
