تۇركىستان وبلىسىندا مال جايۋ قاعيدالارىن بۇزعان 75 ادام جاۋاپقا تارتىلدى
تۇركىستان. KAZINFORM - وڭىردە «مال ۇرىسى» جەدەل-پروفيلاكتيكالىق ءىس- شاراسىن ءوتىپ جاتىر.
رەيدتىك جۇمىستار بارىسىندا يەسىز مال جايۋدىڭ 48 فاكتىسى انىقتالىپ، 579 باس ءۇي جانۋارى قورالارعا قامالدى. مال جايۋ قاعيدالارىن بۇزعانى ءۇشىن 75 ادام جاۋاپقا تارتىلسا، مال مەن ەت ونىمدەرىن زاڭسىز تاسىمالداعان 39 ادامعا اكىمشىلىك حاتتامالار ءتۇزىلدى.
تۇركىستان وبلىسى پوليسيا دەپارتامەنتىنىڭ كريمينالدىق پوليتسيا قىزمەتكەرلەرى، ۆەتەرينارلىق ينسپەكتسيامەن جانە اكىمدىكپەن بىرلەسىپ سايرام اۋدانى قارابۇلاق اۋىلىندا 6 مال سويۋ ورنىن تەكسەردى. ناتيجەسىندە ۆەتەريناريا سالاسىنداعى قۇقىق بۇزۋشىلىقتار ءۇشىن 30 دان استام اكىمشىلىك حاتتاما تولتىرىلدى.
قازىعۇرت اۋدانىندا مال ۇرلىعىنا قاتىسى بار ەكى كۇدىكتى ۇستالىپ، ولاردان ۇرلانعان مالدار تاركىلەندى. سونداي-اق ىزدەۋ شارالارى بارىسىندا، مال يەلەرىنە جالپى 55 باس ءتورت تۇلىك قايتارىلدى. ونىڭ ىشىندە 22 جىلقى مەن 33 باس ۇساق مال بار.
- تۇركىستان وبلىسىنىڭ پوليتسەيلەرى مال ۇرلىعىنىڭ الدىن الۋ، قۇقىق بۇزۋشىلىقتاردى انىقتاۋ جانە مالدى زاڭسىز تاسىمالداۋ، سونداي-اق بازارلار مەن ەت ونىمدەرىن ساتۋ پۋنكتتەرىندە ءتيىستى قۇجاتتاردىڭ بار- جوعىن تەكسەرۋ بويىنشا ءىس- شارالاردى جالعاستىرۋدا، - دەلىنگەن ۆەدومستۆا اقپاراتىندا.
ايتا كەتەيىك، بۇدان بۇرىن تۇركىستاندا ادامداردىڭ ۋلانۋ فاكتىسىنە قاتىستى تەرگەۋ باستالعانىن جازعان بولاتىنبىز.
