تۇركىستان وبلىسىندا لاۋازىمدى تۇلعالار ۇستالدى
تۇركىستان وبلىسىنىڭ پروكۋراتۋراسى تولەبي اۋدانى اكىمدىگىنىڭ لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋ باستادى. ولار اۋداننىڭ ارنايى جەر قورىنداعى تارتىمدى جەر ۋچاسكەلەرىن زاڭسىز اكتىلەردى راسىمدەۋ ارقىلى ۇسىنعان دەپ ايىپتالۋدا. Kazinform بۇل تۋرالى وبلىس پروكۋراتۋراسىنا سىلتەمە جاساپ حابارلايدى.
اتاپ ايتقاندا، اۋداننىڭ جەر قاتىناستارى ءبولىمىنىڭ باسشىسى ءوزىنىڭ قىزمەت بابىن پايدالانا وتىرىپ، وسى ءبولىمنىڭ بۇرىنعى باسشىسىمەن الدىن الا ءسوز بايلاسۋ ارقىلى 200 گەكتاردان استام قۇنارلى جەر ۋچاسكەلەرىن زاڭسىز راسىمدەدى دەپ كۇتىكتەلۋدە. جەر تەلىمدەرىنىڭ نارىقتىق قۇنى 326 ميلليون تەڭگەنى قۇرايتىنى ءمالىم ەتىلگەن.
تۇركىستان وبلىسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسى اسا ءىرى مولشەردە الاياقتىق جاسادى دەپ ايىپتالىپ وتىرعان كۇدىكتىلەردى ۋاقىتشا ۇستاۋ يزولياتورىنا قامادى.
«قازىرگى تاڭدا اتالعان قىلمىسقا باسقا دا تۇلعالاردىڭ قاتىستىلىعىن انىقتاۋعا باعىتتالعان تەرگەۋ ارەكەتتەرى جۇرگىزىلىپ جاتىر»، - دەلىنگەن ءوڭىر پروكۋراتۋراسىنىڭ حابارلاماسىندا.
