تۇركىستان وبلىسىندا اتا-انالار شەتەلگە جۇمىسقا بارۋ ءۇشىن بالاسىن مەشىتكە تاستاپ كەتكەن
استانا. KAZINFORM - تۇركىستاندىق اتا-انالار كورەياعا جۇمىسقا بارامىن دەپ بالاسىن مەشىتتىڭ قاراۋىنا قالدىرعان جايتتار انىقتالدى، - دەپ حابارلايدى otyrar.kz.

وڭىرلىك پروكۋراتۋرا مالىمەتىنشە، 20 بالانى اتا-اناسى ءتۇرلى سەبەپتەرمەن ءدىن وكىلدەرىنە سەنىپ تاپسىرعان. ماماندار مۇنداي دەرەك وتباسىلىق-تۇرمىستىق زورلىق-زومبىلىقتىڭ الدىن الۋ ماقساتىندا وتكىزىلگەن ءىس-شارا بارىسىندا بەلگىلى بولعانىن ايتتى.
«جەتىساي جانە تولەبي اۋداندارىندا ۋاكىلەتتى ورگانداردىڭ نازارىنان تىس قالعان 250 وتباسى مەشىتتەن كومەك سۇراعان، ونىڭ ىشىندە 20 بالانى اتا-اناسى ءتۇرلى سەبەپتەرمەن مەشىتتەرگە قالدىرعان بولاتىن. بۇل وتباسىلارمەن سويلەسۋ بارىسىندا ولاردىڭ قاراپايىم مەملەكەتتىك كومەك الۋ پروتسەدۋرالارىن بىلمەيتىنى ءمالىم بولدى»، - دەيدى تۇركىستان وبلىسى پروكۋرورىنىڭ كومەكشىسى ماقسات ءجۇسىپباي.
سونىمەن قاتار، وڭىردە كامەلەتكە تولماعان مىڭ جارىم بالانى ەشقانداي رەسمي قۇجاتتارسىز تۋىستارىنىڭ تاربيەسىنە بەرۋ دەرەگى تىركەلدى. قازىر ولاردى اتا-اناسىنا قايتارۋ جۇمىستارى جۇرگىزىلىپ جاتىر. وبلىستىق پروكۋراتۋرا وكىلدەرى بۇل جايتتى باقىلاۋىنا العانىن ايتادى.
«شاردارا اۋدانىنىڭ وزىندە 215 كامەلەتكە تولماعان بالانىڭ اتا-انالارى وزدەرىنە زاڭمەن جۇكتەلگەن تاربيەلەۋ جونىندەگى مىندەتتەرىن ورىنداماي، ءتۇرلى وتباسىلىق سەبەپتەرمەن ءوز بالالارىن تۋىستارىنىڭ قاراۋىنا زاڭدا بەلگىلەنگەن تارتىپكە قايشى قالدىرعان. وسىعان سايكەس پروكۋراتۋرا تاراپىنان ۋاكىلەتتى ورگاندارعا زاڭناما ءتۇسىندىرۋ، كومەك كورسەتۋ جانە كەمشىلىكتەردى جويۋ تۋرالى تاپسىرمالار بەرىلدى. بۇل باعىتتاعى جۇمىستار جالعاسۋدا جانە پروكۋراتۋرانىڭ باقىلاۋىندا»، - دەيدى تۇركىستان وبلىسى پروكۋرورىنىڭ كومەكشىسى ماقسات ءجۇسىپباي.