تۇركىستان وبلىسىندا 7 مىڭ ادامدى جۇمىسپەن قامتيتىن جىلىجاي سالىنىپ جاتىر
تۇركىستان. KAZINFORM - كەلەس اۋدانىندا ەلىمىزدەگى ەڭ ۇلكەن جىلىجاي كەشەنى سالىنىپ جاتىر. اۋماعى 500 گەكتاردان اساتىن كەشەندە جىلىنا 240 مىڭ توننا كوكونىس وسىرىلمەك.
تۇركىستان وبلىسىنىڭ اكىمى دارحان ساتىبالدى اۋقىمدى جوبانى جۇزەگە اسىرىپ جاتقان جاتقان «ەكو-كۋلتۋرا» حولدينگىنىڭ پرەزيدەنتى الەكساندر رۋداكوۆ باستاعان ينۆەستورلارمەن اگرو سالاداعى ىنتىماقتاستىق ماسەلەلەرىن تالقىلادى.
قازىر كەلەس اۋدانىندا 51 گەكتار جەردە جوبانىڭ العاشقى كەزەڭى جۇزەگە اسىپ جاتىر. ول كەلەر جىلى ىسكە قوسىلادى. 7 مىڭ ادام جۇمىسپەن قامتىلادى. ينۆەستيتسيا كولەمى - 524 ميلليارد تەڭگە.
كەلەر جىلدىڭ باسىنان باستاپ جىلىجايلار ىسكە قوسىلا باستايدى. جىل سوڭىندا قۇرىلىسى تولىق اياقتالىپ، اۋقىمدى جۇمىستار جۇزەگە اسىرىلادى. كەزدەسۋدە تاراپتار ءبىرقاتار بىرلەسكەن جوبانى تالقىلادى.
وبلىس اكىمى ينۆەستورلارعا اۋىل شارۋاشىلىعىمەن بىرگە، يندۋستريا، تۋريزم باعىتتارى بويىنشا جاڭا جوبالاردى قولعا الۋعا شاقىردى. وڭىردەگى وندىرىستىك پاركتەردە ءوندىرىس ورىندارىن اشۋ جولدارىن ءتۇسىندىرىپ، ەگىستىكتى ءارتاراپتاندىرۋ، اۋقىمىن ارتتىرۋ، جەمىس ساقتاۋ قويمالارىن سالۋ سەكىلدى جاڭا جوبالاردى باستاۋعا شاقىردى. سونداي-اق سۋبليماتسيا، ياعني كونسەرۆاتسيالاۋدىڭ ەڭ جەتىلدىرىلگەن ادىستەرىنىڭ ءبىرىن دامىتۋدى ۇسىندى. بۇل ءادىس ەشقانداي حيميانى نەمەسە كونسەرۆانتتاردى قاجەت ەتپەيدى جانە قاپتامانىڭ تۇرىنە بايلانىستى مۇزداتىلعان كەپتىرىلگەن ونىمدەردى ونداعان جىلدارعا ساقتاۋعا بولادى.
«تۇركىستانعا قوش كەلدىڭىزدەر. بۇگىنگى كەزدەسۋدە وزدەرىڭىزدى وڭىرىمىزدە وزگە دە تىڭ جوبالاردى باستاۋعا شاقىرامىز. بۇل باعىتتا ءبىرقاتار ۇسىنىس قورجىنىن قۇردىق. ىنتىماقتاستىعىمىز ءوزارا ءتيىمدى بولىپ، ۇلكەن پەرسپەكتيۆالارعا جول اشىپ، تۇراقتى تۇردە دامي بەرەتىنىنە سەنىمدىمىن. تۇركىستان وبلىسى ينۆەستيتسيالىق بايلانىستاردى تەرەڭدەتىپ، جاڭا بىرلەسكەن جوبالاردى جۇزەگە اسىرۋعا دايىن. اتقارىپ جاتقان جۇمىستارمەن بىرگە، ءوندىرىستى دامىتۋعا، تەرەڭ وڭدەۋ، ءوندىرىس ورىندارىن اشۋعا قاتىستى ءبىرقاتار قوسىمشا جوبانى ۇسىنعالى وتىرمىز. ءوز تاراپىمىزدان ولاردى جان- جاقتى قولداۋعا دايىنبىز. تۇرعىندارىمىزدى جەرگىلىكتى ونىممەن قامتىپ، جۇمىس ورىندارىن كوپتەپ اشۋ - باستى ماقساتىمىز. ءونىمدى ساقتاۋدى، قايتا وڭدەۋدى جۇزەگە اسىرا الامىز. سىزدەردىڭ سۇرانىستارىڭىزعا ساي ءوزىمىزدىڭ شارۋالار دايىن ءونىمىن ۇسىنا الادى. اۋىل شارۋاشىلىعى سالاسىندا كوش باستاپ كەلەتىن ءبىزدىڭ وبلىستا وسى سالانى بارىنشا دامىتۋعا مۇددەلىمىز. بۇل باعىتتاعى بارلىق باستاماعا بارىنشا قولداۋ كورسەتۋگە دايىنبىز»، - دەدى دارحان ساتىبالدى.
ءوز كەزەگىندە «ەكو- كۋلتۋرا» حولدينگىنىڭ پرەزيدەنتى الەكساندر رۋداكوۆ بۇگىن «ەكو- كۋلتۋرا» حولدينگىنىڭ بارلىق باسشىسىمەن بىرگە كەلىپ وتىرعانىن ايتتى.
«كۇنى كەشە عانا كەلىسىپ، بۇگىن كەزدەسىپ وتىرعانىمىزعا قۋىنىشتىمىز. ەكى جاقتىڭ دا كوزدەگەنى ءبىر. بىزگە جان- جاقتى قولداۋ بىلدىرگەندەرىڭىزگە العىس ايتامىز. ءسوزدى ىسپەن دالەلدەپ جاتقانىڭىز قۋانتادى. ينفراقۇرىلىم ۋاقىتىنان بۇرىن دايىن بولدى. ءارى قاراي بىرگە ەڭبەك ەتەتىنىمىزگە سەنەمىن. كەلەس اۋدانىنداعى جوبامىز الداعى اقپان ايىندا ىسكە قوسىلا باستايدى. جۇمىسشىلاردى قابىلداپ، بارلىق الەۋمەتتىك قولداۋ كورسەتەمىز. 2025 -جىلدىڭ اياعىندا قۇرىلىس تولىق اياقتالىپ، اۋقىمدى جۇمىستى باستايمىز. ءبىز بايلىققا كەنەلۋ ءۇشىن ەمەس، ينۆەستيتسيا قۇيىپ، جۇمىس ورىندارىن بارىنشا اشۋ ءۇشىن كەلدىك. ونى ورىنداۋعا كۇش سالامىز. جاڭا يدەيالارىڭىز، تىڭ جوبالارىڭىز ءۇشىن العىس ايتامىز. ناقتى سۇرانىسقا يە جەمىس- جيدەك، كوكونىستىڭ اسسورتيمەنتىن ارتتىرۋعا دايىنبىز. جەرگەلىكتى نارىقتى قامتىپ قانا قويماي، رەسەي، دۋباي، قىتايعا ەكسپورتتاي الامىز. جاڭا جوبالاردى جۇزەگە اسىرۋ باعىتتارىن ءالى ناقتىلاپ، بىرلەسە جۇزەگە اسىرۋعا كۇشىمىزدى سالامىز»، - دەدى الەكساندر رۋداكوۆ.
تالقىلاۋ قورىتىندىسى بويىنشا تاراپتار ايتىلعان بارلىق ۇسىنىس پەن پىكىرلەردىڭ پىسىقتالاتىنىن اتاپ ءوتتى.
تۇركىستان وبلىسى - رەسپۋبليكا حالقىن جەمىس- كوكونىس ونىمدەرىمەن، ونىڭ ىشىندە جىلىجاي كەشەنىندەگى قىزاناق، قيارمەن قامتاماسىز ەتەتىن نەگىزگى ءوڭىر. وبلىستا 2 مىڭ گەكتار القاپتا 3 مىڭنان استام جىلىجاي بار نەمەسە رەسپۋبليكاداعى جىلىجايلاردىڭ 71 پايىزى ورنالاسقان. وندا 12 مىڭنان استام ادام ەڭبەك ەتەدى. وسى سالاعا تارتىلعان ينۆەستيتسيا كولەمى 7 ەسە ۇلعايدى.
«ەكو- كۋلتۋرا» - 13 جىل بويى تۇراقتى دامىپ كەلە جاتقان، جابىق توپىراقتا ەكولوگيالىق تازا كوكونىس وسىرەتىن ءىرى اگروونەركاسىپتىك حولدينگتىڭ ءبىرى. ءبىر جىل ىشىندە وندىرگەن ءونىم كولەمى 300 مىڭ توننادان اسادى.
