تۇركىستان وبلىسىندا 588 قونىس اۋدارۋشىعا «قانداس» مارتەبەسى بەرىلدى
تۇركىستان. KAZINFORM - ەلگە كەلۋشىلەر سارىاعاش، ورداباسى، قازىعۇرت، كەلەس، سايرام، جەتىساي، تۇلكىباس، ماقتارال، شاردارا اۋداندارى مەن ارىس جانە تۇركىستان قالاسىنا قونىستانعان. بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىربايەۆا مالىمدەدى.
وڭىرگە جىل باسىنان بەرى 339 وتباسى، 588 ەتنيكالىق قازاق قونىس اۋدارعان. ونىڭ 570 ى وزبەكستاننان بولسا، 10 ى تاجىكستاننان كەلگەن. ال 3 ادام رەسەيدەن كوشىپ كەلسە، باسقا مەملەكەتتەردەن 5 ادام قونىس اۋدارعان. ال وسى جىلدىڭ جەتى ايىندا تۇركىستان وبلىسىنان 165 وتباسى نەمەسە 599 ادام ەلىمىزدىڭ سولتۇستىك ايماقتارىنا قونىس اۋدارعان.
«ەڭبەك جانە حالىقتى الەۋمەتتىك قورعاۋ مينيسترلىگى 2024 -جىلعا رەسپۋبليكا بويىنشا 7050 كۆوتا ءبولىپ، قانداستار مەن قونىس اۋدارۋشىلار ءۇشىن مەملەكەتتىك قولداۋ كورسەتەتىن 7 وبلىستى بەلگىلەدى. ولاردىڭ ىشىندە اباي وبلىسى، قاراعاندى وبلىسى، قوستاناي وبلىسى، پاۆلودار وبلىسى، سولتۇستىك قازاقستان وبلىسى، ۇلىتاۋ وبلىسى، شىعىس قازاقستان وبلىسى بار. بولىنگەن كۆوتا نەگىزىندە شىعىس قازاقستان وبلىسىنا 9 وتباسى، قوستاناي وبلىسىنا 3 وتباسى، پاۆلودار وبلىسىنا 78 وتباسى، سولتۇستىك قازاقستان وبلىسىنا 66 وتباسى، قاراعاندى وبلىسىنا 1 وتباسى، اباي وبلىسىنا 6 وتباسى، ۇلىتاۋ وبلىسىنا 2 وتباسى كوشتى»، - دەدى ءاسيا تەمىربايەۆا.
سونداي-اق، سپيكەر، وڭىردەگى از قامتىلعان ازاماتتاردىڭ تابىستارىن ارتتىرۋ باعىتىندا اتقارىلىپ جاتقان جۇمىستارمەن تانىستىردى.
«وبلىستا كوپبالالى وتباسىلار سانى 185690 نەمەسە رەسپۋبليكانىڭ بارلىق كوپبالالى انالارىنىڭ تورتتەن ءبىر بولىگىن قۇرايدى. از قامتىلعان ازاماتتاردىڭ تابىستارىن ارتتىرۋ ارقىلى كەدەيلىكتى تومەندەتۋ بويىنشا جۇمىستار بيىل دا جالعاسىپ جاتىر. 2024 -جىلعا قاراي كەدەيلىك دەڭگەيىن %5,5 عا دەيىن نەمەسە 2023 -جىلمەن سالىستىرعاندا %25 عا تومەندەتۋگە مەجەلەنىپ وتىر» - دەدى باسقارما باسشىسى.
بيىل وڭىردەگى 116,2 مىڭ ادامدى اتاۋلى الەۋمەتتىك كومەكپەن قامتاماسىز ەتۋگە بيۋدجەتتەن 9,6 ميلليارد تەڭگە بولىنگەن. سونداي-اق، كەدەيلىك دەڭگەيىن تومەندەتۋ جونىندە اۋدان، قالا اكىمدەرىمەن مەموراندۋمدار ءتۇزىلىپ، اتاۋلى الەۋمەتتىك كومەك كورسەتۋدىڭ 2024 -جىلعا توقسان سايىنعى جوسپارى بەكىتىلدى.
«بيىل 1-تامىزعا دەيىنگە مالىمەتتەرگە سۇيەنەر بولساق، 14160 وتباسىعا نەمەسە 84860 ادامعا اتاۋلى الەۋمەتتىك كومەك تاعايىندالىپ، كومەك الۋشىلار سانى 19563 ادامعا تومەندەدى. بۇل ماقساتقا 4,1 ميلليارد تەڭگە جۇمسالدى. وتكەن جىلدىڭ ءتيىستى كەزەڭىمەن سالىستىرعاندا از قامتىلعان ازاماتتاردىڭ سانى 61224 ادامعا نەمەسە %41,9 تومەندەدى»، - دەدى ءاسيا تەمىربايەۆا.
اۆتور
قايرات زاينيشەۆ
