تۇركىستان وبلىسىندا 5310 ادامدى ءيت قاپقان، 694 ادام مىسىقتان زارداپ شەككەن
تۇركىستان وبلىسىندا 6 مىڭنان استام ادامدى جانۋارلار جاراقاتتاعان، دەپ حابارلايدى Kazinform.
وتكەن جىلى تۇركىستان وبلىسىندا 6425 ادام ءتۇرلى جانۋارلاردان جاراقات العان. ونىڭ ىشىندە 5310 ادامدى ءيت قاپسا، 694 ادام مىسىقتان، 46 ازامات ءىرى قارا مالىنان زارداپ شەكتى. دەگەنمەن، وڭىردە قۇتىرۋ اۋرىنا شالدىعۋ جاعدايى تىركەلگەن جوق.
ءوڭىردىڭ ەپيدەميولوگتارى تۇرعىنداردى اسا قاۋىپتى اۋرۋدان ساق بولۋعا شاقىرادى.
«قۇتىرۋ اۋرۋىنىڭ ۆيرۋسى اۋرۋ جانۋارلاردان تىستەۋ، تىرناۋ كەزىندە سىلەكەي ارقىلى ادامنىڭ تەرى قاباتىنا ەنەدى. سوسىن جۇيكە تالشىقتارى مەن جۇلىن ميىنا جەتكەن ۆيرۋس ادام ومىرىنە قاۋىپ توندىرەدى. قۇتىرۋ اۋرۋىنا شالدىققان ادامنىڭ دەنە قىزۋى كوتەرىلىپ، تىنىس الۋ مەن جۇتىنۋى قيىندايدى. ناۋقاس سۋدى كورگەندە نەمەسە ونى ويلاعان كەزدە جۇتقىنشاق پەن كومەكەيدىڭ سپازمالارى اشىلىپ، اۋانىڭ قوزعالىسىنان، جارىق شامىنىڭ اسەرىنەن، قاتتى داۋىس، شۋىلدىڭ اسەرىنەن ۇستامالارى ۇستاي باستايدى»، - دەدى وبلىستىڭ باس مەملەكەتتىك سانيتارلىق دارىگەرى نۇربەك نىشانوۆ.
ەپيدەميولوگ ماماندار ادامداردىڭ ءومىرى مەن دەنساۋلىعىنا قاۋىپ توندىرمەس ءۇشىن، قولداعى جانۋارلاردى ۋاقتىلى مال دارىگەرلەرىنە كورسەتىپ، اۋرۋعا قارسى ۆاكسينا سالدىرۋ كەرەكتىگى تۋرالى كەڭەس بەرەدى. ەڭ باستىسى، مىنەزىندە وزگەرىستەر بايقالعان جانۋارلاردى ادامداردان اۋلاق ۇستاۋ كەرەك.
ايتا كەتەيىك، 2022 -جىلى اياعىن ءيت قاپقان 14 جاسار بالا ۋاقتىلى ەم-دوم الماۋدىڭ سالدارىنان اراعا ءبىر جىل سالىپ كوز جۇمعان بولاتىن.
