تۇركىستان وبلىسىندا 4 جىل بۇرىن جوعالعان 16 جاسار قىز امان-ەسەن تابىلدى
استانا. قازاقپارات - تۇركىستان وبلىسىندا پوليتسيا 4 جىل بۇرىن جوعالعان قىزدى ىزدەپ تاپتى.

تولە ءبي اۋداندىق پوليتسياسى وسىدان 4 جىل بۇرىن ءىز-ءتۇزسىز جوعالعان قىزدى ۇزدىكسىز ىزدەۋ ناتيجەسىندە امان-ەسەن تاۋىپ، اناسىمەن قاۋىشتىردى.
2021-جىلى جازدا جەرگىلىكتى تۇرعىن پوليتسياعا 16 جاستاعى قىزى جوعالعانىن ايتىپ، ارىزدانعان. بىرنەشە جىل وتسە دە تۇرعىننىڭ ارىزى نەگىزىندە ىزدەۋ جالعاسىپ، ناتيجەسىندە 2025-جىلى قاڭتاردا ءبىر-بىرىنەن كوز جازىپ قالعان اناسى مەن قىزى كەزدەستى.
«قىزىمنان حابارسىز قالىپ، نەندەي جاعدايدا ەكەنىن بىلە الماي جۇرگەن كۇندەر ارتتا قالدى. كوپ راقمەت. اراسىندا وزدەرىڭىزگە دە سەنىمسىزدىك بىلدىرگەن ەدىم، بۇگىن، مىنە، ءۇمىتىم اقتالىپ وتىر. سىزدەرگە العىسىم شەكسىز»، - دەدى قىزدىڭ اناسى.
پوليتسيا قىزدى الماتى قالاسىنداعى تاماقتانۋ ورىندارىنىڭ بىرىندە جۇمىس ىستەپ جۇرگەن جەرىنەن تاپقان.
بۇگىندە قىزدىڭ وسىنشا ۋاقىت قايدا، نە سەبەپپەن حابارسىز كەتكەنىن انىقتاۋ ءۇشىن جۇمىستار جۇرگىزىلىپ جاتىر.