تۇركىستان وبلىسىندا 14 جاستاعى قىزدى زورلادى دەگەن كۇدىكپەن بىرنەشە جىگىتكە تەرگەۋ جۇرگىزىلىپ جاتىر
تۇركىستان وبلىسىندا 14 جاستاعى قىزدى زورلادى دەگەن كۇدىكپەن بىرنەشە جىگىتكە تەرگەۋ جۇرگىزىلىپ جاتىر، دەپ حابارلايدى Kazinform.
الەۋمەتتىك جەلىدە تۇركىستان وبلىسىندا 14 جاستاعى قىزدىڭ زورلانعانى جايىندا اقپارات تارادى. وڭعار قابدەن ەسىمدى جەلى بەلسەندىسىنىڭ جازۋىنشا، كامەلەتكە تولماعان قىزدى بىرنەشە جىگىت قۇربىلارىنىڭ كوزىنشە زورلاعان. سول ساتتە وزگە قىزدار تەلەفونعا ءتۇسىرىپ تۇرىپتى. ءتىپتى كۇلىپ، مازاق قىلعان.
«جىگىتتەر قىزدى زورلاپ بولعان سوڭ، ەكى كۇن بويى قاماپ ۇستاعان. قىزدىڭ اكە- شەشەسى پوليتسياعا ارىزدانىپ، پوليتسيا قىزدى تاپقان. ەندى قىلمىستىق ءىس قوزعالعاندا جىگىتتەردىڭ ءبىرىنىڭ تۋىستارى قۇدا ءتۇسىپ كەلىپ وتىر ەكەن. ون تورتتەگى قىزعا! انا كامەراعا ءتۇسىرىپ تۇرعان قىزدارعا دا ءىس قوزعالۋ كەرەك! قىزدى ۇيىنەن الىپ شىققان سولار دەيدى جابىرلەنۋشى»، - دەپ جازدى جەلى بەلسەندىسى.
ال تۇركىستان وبلىسى پوليتسيا دەپارتامەنتىنىڭ باسشىسى مۇرات قابدەنوۆ زورلىق- زومبىلىق فاكتىسى تۋرالى ءىستىڭ بارىسىن ءتۇسىندىرىپ بەردى.
«تولەبي اۋداندىق پوليتسيا بولىمىندە جەرگىلىكتى تۇرعىننىڭ كامەلەتكە تولماعان قىزىنا قاتىستى قۇقىققا قارسى ءىس- قيمىل فاكتىسى بويىنشا سوتقا دەيىنگى تەرگەۋ جۇرگىزىلىپ جاتقانىن حابارلايمىن. بۇل فاكت ق ر ق ك 120-بابى بويىنشا تىركەلگەن. جەدەل- ىزدەستىرۋ ءىس- شارالارى بارىسىندا ىسكە قاتىسى بولۋى مۇمكىن دەگەن بىرنەشە جىگىتتەن جاۋاپ الىندى. ال كۇدىكتى رەتىندە تانىلعان جاس جىگىتتى قاماۋعا الدىق»، - دەپ جاۋاپ بەردى پوليتسيا دەپارتامەنتىنىڭ باسشىسى.
قازىر اتالعان فاكت بويىنشا ءتيىستى ساراپتامالار تاعايىندالعان. بەتتەستىرۋ، جاۋاپ الۋ، ايعاقتى زاتتارمەن جۇمىس ىستەۋ سەكىلدى تەرگەۋ ارەكەتتەرى جۇرگىزىلىپ جاتىر.
«دەپارتامەنت باسشىلىعىنان ارنايى توپ قۇرىلىپ، تولەبي اۋدانىندا ىسكە قاتىستى شارالاردى اتقارۋدا. سەبەبى بۇل قىلمىستىق ءىستىڭ تەرگەۋ بارىسى مەن توپتىڭ جۇمىسى مەنىڭ جەكە باقىلاۋىمدا. قوسىمشا ايتارىم، قىلمىسقا سانالى تۇردە بارعان ادام ءوزىنىڭ ارەكەتى ءۇشىن زاڭ الدىندا جاۋاپ بەرۋى كەرەك! سوندىقتان بۇل ىسكە قاتىستى بارلىق دالەل جيناقتالىپ، سوتقا جولداناتىن بولادى»، - دەپ جازدى مۇرات قابدەنوۆ.
