رەسپۋبليكادا بالا تۋۋ بويىنشا كوش باستاپ تۇرعان وبلىس بەلگىلى بولدى

население, демография
كوللاج: Kazinform / Midjourney

تۇركىستان. KAZINFORM - تۇركىستان وبلىسى حالقىنىڭ سانى 2140926 ادامدى قۇرادى. بۇل تۋرالى ق ر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ تۇركىستان وبلىسى بويىنشا دەپارتامەنتى باسشىسىنىڭ ورىنباسارى نۇرقوجا بەكجانوۆ مالىمدەدى.

2023 -جىلدىڭ 1-جەلتوقسانىنداعى كورسەتكىش بويىنشا تۇركىستان وبلىسى حالقىنىڭ سانى 2140926 ادامدى قۇراعان. ونىڭ ىشىندە قالا حالقى - 527633 بولسا، اۋىل حالقىنىڭ ۇلەسى - 1613293.

«وڭىردە قاڭتار- قاراشا ايلارىندا 51145 بالا تۋعان. ونىڭ 26323 ى - ۇل بولسا، 24822 سى - قىز. بۇگىندە وبلىس دەموگرافيانى كوتەرۋ بويىنشا رەسپۋبليكادا كوش باسىندا، ونىڭ ۇلەسى %14,3 قۇراپ وتىر»، - دەدى نۇرقوجا ەرمەك ۇلى.

بۇدان بولەك، سپيكەر وتكەن جىلدىڭ قاڭتار- قاراشا ايلارىندا 10826 نەكە تىركەلگەندىگىن ايتتى. سونداي-اق، 2023 -جىلى تىركەلگەن اجىراسۋلار سانى 2022 -جىلمەن سالىستىرعاندا %5,6 عا كەمىگەنىن جەتكىزدى.

سونىمەن قاتار، وتكەن جىلدىڭ قاڭتار- قاراشا ايلارىندا كوشى-قونمەن وبلىسقا 35953 ادام كەلگەن. ونىڭ ىشىندە 35473 ادام - قازاقستاننىڭ باسقا وبلىستارىنان، 473 ادام - ىنتىماقتاستىق ەلدەرىنەن، 7 ادام - الىس شەت ەلدەردەن قونىس اۋدارعان. جالپى وبلىس ىشىندەگى كوشى-قون 40373 ادامدى قۇراعان.

سوڭعى جاڭالىقتار