تۇركىستان نەگە كەدەي وڭىرلەر رەيتينگىندە كوش باستاپ تۇر - اكىم جاۋاپ بەردى
تۇركىستان. KAZINFORM - تۇركىستان وبلىسىنىڭ اكىمى دارحان ساتىبالدى ايماقتىڭ «ەڭ كەدەي ءوڭىر» رەيتىنگىندە الدىڭعى قاتاردا تۇرۋ سەبەبىن ءتۇسىندىردى.
«تۇركىستان وبلىسى كوپ جىلدان بەرى «ەڭ كەدەي ءوڭىر» رەيتىنگىندە كوش باستاپ تۇر. نەگە دەپ ويلايسىز؟»، - دەپ سۇراق قويدى Kazinform ءتىلشىسى ورتالىق كوممۋنيكاتسيالار قىزمەتىندە.
ءوز جاۋابىندا اكىم ايماقتى كەدەي دەپ ايتا المايتىنىن، ونىڭ بايلىعى - تۇرعىندارى ەكەنىن اتاپ ءوتتى.
«قازاقستاندا 20 ءوڭىر بولسا، سونىڭ ىشىندە تەك 3 ايماق دونور بولىپ سانالادى - بۇل استانا، الماتى جانە اتىراۋ وبلىسى. قالعان ايماقتاردىڭ بارلىعى دوتاتسيادا وتىر. ال ەگەر قاي ءوڭىر رەسپۋبليكاعا سالىق سەكىلدى ءتۇسىمدى كوپ تولەيدى دەسەك، قايتادان استانا، الماتى، اتىراۋ وبلىسى جانە تاعى ءبىر ايماقتان كەيىن بەسىنشى ورىندا تۇركىستان وبلىسى تۇر. 10 ايدىڭ قورىتىندىسى بويىنشا رەسپۋبليكالىق جانە جەرگىلىكتى بيۋجەتكە 650 ميلليارد تەڭگە سالىق تولەندى. ياعني، تابىس بويىنشا ءبىز 20 ايماقتىڭ ىشىندە بەسىنشى ورىندامىز»، - دەدى د. ساتىبالدى ورتالىق كوممۋنيكاتسيالار قىزمەتىندە.
اكىمنىڭ ايتۋىنشا، سول تابىستى جان باسىنا شاققاندا مولشەرى ازايىپ قالادى، سەبەبى وڭىردە حالىق سانى كوپ.
«كەيبىر ايماقتارمەن سالىستىرعاندا ءبىزدىڭ تۇرعىندار سانى 2-3 ەسە، ال كەيدە 7-8 ەسە كوپپىز. سوندىقتان جان باسىنا شاققانداعى قارجىلاندىرۋ تومەن بولىپ شىعادى. ەكىنشىدەن، رەسپۋبليكا بويىنشا شامامەن 800 مىڭ كوپبالالى وتباسى بولسا، سونىڭ 190 مىڭى نەمەسە 1/4 بولىگى تۇركىستان وبلىسىندا تۇرادى. ءبىراق بۇل ماسەلەنىڭ ەكىنشى جاعى بار - مەن ءوزىم كەلەس اۋدانىندا تۋىپ-ءوستىم. مەنىڭ انام دا، اكەم دە جۇمىسسىز قالعاندا، ۇيدەگى التى ۇل توق جۇردىك. نەگە؟ سەبەبى ءبىز شارۋاشىلىق جۇرگىزدىك، مال ۇستادىق - سونىڭ ارقاسىندا ماي، ايران، ءسۇت الدىق، تاندىر جاۋىپ، باقشا ەگىپ، ءوزىمىزدى قامتاماسىز ەتىپ وتىردىق. ول رەسمي تابىس بولىپ ەسەپتەلمەيدى. قازىر دە وبلىس حالقىنىڭ %80 اۋىلداردا تۇرادى، ولارعا جەكە شارۋاشىلىقتارى كومەكتەسەدى»، - دەيدى دارحان ساتىبالدى.
ايتا كەتەيىك، كەنتاۋ قالاسى ەكولوگيالىق اپات ايماعى دەپ تانىلدى جانە تۇرعىندار جالاقىسىنا %20 ۇستەمەاقى قوسىلادى.
بۇعان دەيىن دارحان ساتىبالدى وڭىردەگى جۇمىسسىزدىق سەبەپتەرىن دە ايتىپ بەرگەن ەدى.
