تۇركىستان «حالىقارالىق قولونەرشىلەر قالاسى» مارتەبەسىن الۋعا نيەتتى
تۇركىستان. KAZINFORM- تۇركىستان قالاسىنا قولونەردى بىرىكتىرۋشى - «World Craft Council» حالىقارالىق ۇيىمىنىڭ ساراپشىلارى كەلدى.
دۇنيەجۇزىلىك قولونەر كەڭەسىنىڭ ازيا-تىنىق مۇحيتى ايماعى بويىنشا ۆيتسە-پرەزيدەنتى ايدارحان كاليەۆ پەن ساراپشىلارى ءۇندىستاندىق سوحان كۋمار دجا، تۇركيادان ماحووتچيان يالدا، دۇنيەجۇزىلىك قولونەر كەڭەسىنىڭ وڭتۇستىك-شىعىس ازيا ايماعى بويىنشا ۆيتسە-پرەزيدەنتى جانە ساراپشىسى لە با نگوك قالا اكىمىمەن كەزدەسىپ، قالاداعى قولونەر سالاسىنىڭ دامۋىمەن تانىستى. سونىمەن قاتار «قولونەرشىلەر قالاسى» مارتەبەسىنە يە بولۋى ءۇشىن اتقارىلاتىن جۇمىس باعىتتارى مەن سالاداعى ىنتىماقتاستىق جايى تالقىلاندى.
وتكەن جىلى دۇنيەجۇزىلىك قولونەر كەڭەسى ۇيىمىنىڭ 31 مۇشەسى تۇركىستان قالاسىنا ارنايى كەلىپ، جەرگىلىكتى قولونەرشىلەردىڭ جۇمىسىنا جوعارى باعا بەرگەن بولاتىن. وسىعان وراي، تۇركىستان قالاسى اتالعان ۇيىمعا مۇشە بولۋعا ءوتىنىم بەرگەن.
باسقوسۋدا دۇنيەجۇزىلىك قولونەر كەڭەسىنىڭ ازيا-تىنىق مۇحيتى ايماعى بويىنشا ۆيتسە-پرەزيدەنتى ايدارحان كاليەۆ تۇركىستانمەن ىنتىماقتاستىقتى دامىتۋعا دايىن ەكەنىن جەتكىزدى. تۇركىستاننىڭ «حالىقارالىق قولونەرشىلەر قالاسى» مارتەبەسىن الۋ ورتاق ماقسات ەكەنىن جەتكىزىپ، وسى جولدا بىرلەسىپ جۇمىس ىستەۋگە نيەتىن ءبىلدىردى.
ال، قالا اكىمى ازىمبەك پازىلبەك ۇلى «حالىقارالىق قولونەرشىلەر قالاسى» مارتەبەسىن الۋدىڭ ماڭىزىنا توقتالدى.
- ۇلى جىبەك جولىنىڭ ماڭىزدى ورتالىقتارىنىڭ ءبىرى بولىپ، ەجەلدەن قولونەردىڭ دامۋىنا ۇلكەن ۇلەس قوسقان تۇركىستان بۇگىندە «حالىقارالىق قولونەرشىلەر قالاسى» مارتەبەسىن الۋعا نيەتتى. بۇگىندە قالامىزدىڭ قولونەر سالاسى ءوزىنىڭ تەرەڭ تامىرى مەن ۇلتتىق ەرەكشەلىكتەرىن ساقتاي وتىرىپ، زاماناۋي ۇردىستەرمەن ۇيلەسىمدى دامىپ كەلەدى. تۇركىستاندىق شەبەرلەر جاساعان كەراميكالىق بۇيىمدار وزدەرىنىڭ اسەمدىگىمەن، ناقىشتى ورنەكتەرىمەن جانە ساپاسىمەن ەرەكشەلەنەدى. الداعى ۋاقىتتا قولنەرشىلەردى قولداۋعا باقىتتالعان ۇلكەن جوبالارىمىز بار، - دەدى قالا باسشىسى.
كوميسسيا قورىتىندىسى الداعى ءساۋىر ايىندا شىقپاق. ەگەر وڭ شەشىم قابىلدانسا، تۇركىستان-حالىقارالىق قولونەرشىلەر قالاسى اتانادى.
