تۇركىستاندا جول قوزعالىسى ەرەجەسىن ورەسكەل بۇزعان جۇرگىزۋشىلەر جازالاندى
استانا. KAZINFORM - تۇركىستان وبلىسىندا جول قوزعالىسى ەرەجەسىن ورەسكەل بۇزعان جۇرگىزۋشىلەر جاۋاپقا تارتىلدى.
تۇركىستان وبلىسىندا كولىك شەرۋىن ۇيىمداستىرىپ، جول قوزعالىسى ەرەجەسىن ورەسكەل بۇزعان جۇرگىزۋشىلەر پوليتسيانىڭ بەينەباقىلاۋ كامەرالارىنا ءتۇستى.
جەدەل باسقارۋ ورتالىعىنىڭ قىزمەتكەرلەرى قاۋىپتى مانەۆر جاساپ، جول ءتارتىبىن بۇزعان 8 اۆتوكولىكتىڭ يەسىن انىقتادى.
ناتيجەسىندە اۆتوكولىكتەر ارنايى ايىپتۇراققا قويىلسا، ال جۇرگىزۋشىلەرگە قاتىستى اكىمشىلىك شارالار قابىلداندى.
بۇدان بولەك Daewoo Nexia ەكى اۆتوكولىگى قارسى قوزعالىس جولاعىنا شىققانى تىركەلدى. اتالعان جۇرگىزۋشىلەرگە قاتىستى جيناقتالعان ماتەريالدار سوتقا جولداندى.
پوليتسيا جولداعى ءتارتىپ بەينەباقىلاۋ كامەرالارى ارقىلى تۇراقتى باقىلاۋدا ەكەنىن ەسكەرتەدى. جول قوزعالىسى ەرەجەسىن ورەسكەل بۇزعان ءاربىر ارەكەت نازاردان تىس قالمايدى جانە زاڭ اياسىندا ءتيىستى شارا قابىلدانادى.
