تۇركىستان وبلىسىندا سۇلتان، ومار، وسمان ەسىمدى ۇشەم دۇنيەگە كەلدى

№ 1 وبلىستىق پەريناتالدىق ورتالىقتىڭ دارىگەرلەرى مەن نەوناتولوگتارى شالا تۋعان نارەستەلەرگە قارقىندى تەراپيا جانە ارنايى كۇتىم كورسەتتى. ناتيجەسىندە ءۇش ءسابيدىڭ دە جاعدايى تۇراقتالىپ، سالماق قوسۋ كورسەتكىشتەرى جاقسارعان.

وبلىستىق دەنساۋلىق ساقتاۋ باسقارماسىنىڭ مالىمەتىنشە، دينارا مامەتوۆا 33 اپتالىق جۇكتىلىك كەزىندە ۇشەم بوسانعان.

نارەستەلەردىڭ ءبىرى - وشاقباي سۇلتان عابيت ۇلى 2026-جىلعى 9-قىركۇيەكتە 2145 گرام سالماقپەن دۇنيەگە كەلگەن. سابيگە «شالا تۋۋ، رەسپيراتورلىق ديسترەسس- سيندروم» دياگنوزى قويىلعان. ول ورتالىقتا 13 تاۋلىك ەم الىپ، 21 -قىركۇيەكتە 2155 گرام سالماقپەن قاناعاتتانارلىق جاعدايدا ۇيىنە شىعارىلدى.

ەكىنشى ءسابي - وشاقباي ومار عابيت ۇلى 2240 گرام سالماقپەن دۇنيەگە كەلىپ، ەمدەۋ ۇيىمىنان 2260 گرام سالماقپەن شىققان. ءۇشىنشى ءسابي - وشاقباي وسمان عابيت ۇلىنىڭ تۋعان كەزدەگى سالماعى 2030 گرام بولسا، شىعارىلعان كەزدە 2050 گرامعا جەتكەن.

پەريناتالدىق ورتالىقتىڭ باسشىسى سالتانات ۋسادۋللايەۆانىڭ ايتۋىنشا، شالا تۋعان ۇشەمدەردىڭ جاعدايىن تۇراقتاندىرۋ مەديتسينا ماماندارى ءۇشىن ۇلكەن جاۋاپكەرشىلىكتى تالاپ ەتكەن.

- ۇشەمدەردىڭ دۇنيەگە كەلۋى - ءبىزدىڭ ورتالىق ءۇشىن ۇلكەن جاۋاپكەرشىلىك ءارى قۋانىش. اسىرەسە 33 اپتالىق مەرزىمدە جانە رەسپيراتورلىق ديسترەسس- سيندروم دياگنوزىمەن تۋعان سابيلەردى امان- ەسەن الىپ شىعۋ - نەوناتولوگتار مەن رەانيماتسيا ءبولىمى ماماندارىنىڭ جوعارى بىلىكتىلىگىنىڭ دالەلى. سابيلەردىڭ سالماق قوسۋ ديناميكاسى جاقسى. وشاقباي اۋلەتىن جاڭا مۇشەلەرىمەن قۇتتىقتايمىز،- دەدى ورتالىق باسشىسى.

دارىگەرلەردىڭ ايتۋىنشا، سابيلەردىڭ الداعى فيزيولوگيالىق دامۋى تۇرعىلىقتى جەرى بويىنشا العاشقى مەديتسينالىق-سانيتارلىق كومەك ۇيىمى مەن ۋچاسكەلىك پەدياترلاردىڭ باقىلاۋىندا بولادى.

بۇعان دەيىن الماتىدا جىل باسىنان بەرى 6 ۇشەم دۇنيەگە كەلگەنىن حابارلاعان ەدىك.