تۇركيانىڭ تاۋ شاڭعى كۋرورتىنداعى ءورت: قازا تاپقاندار سانى 76 عا جەتتى

استانا. KAZINFORM - سەيسەنبىگە قاراعان ءتۇنى تۇركيانىڭ بولۋ پروۆينتسياسىنداعى كارتالكايا تاۋ شاڭعىسى كۋرورتىنداعى قوناقۇيدەن ءورت شىقتى، دەپ جازادى BBC.

Түркияның тау шаңғы курортындағы өрт: қаза тапқандар саны 76-ға жетті
Фото: bbc.com

- قازا تاپقاندار سانى 76 عا جەتتى، - دەپ حابارلادى ىشكى ىستەر ءمينيسترى الي ەرليكايا.

بۇعان دەيىن ول 51 ادام قازا تاپقانىن حابارلاعان. زارداپ شەككەندەردىڭ كەيبىرىنىڭ جاعدايى اۋىر.

ءورت 12 قاباتتى (باسقا دەرەكتەر بويىنشا 11 قاباتتى) گراند كارتال قوناقۇيىندە جەرگىلىكتى ۋاقىت بويىنشا 03:27 دە باستالعان.  قازىر تۇركياداعى جالپى ۇلتتىق ەكى اپتالىق مەكتەپ دەمالىسى باستالدى جانە شاڭعى ماۋسىمىنىڭ قىزۋىنا بايلانىستى قوناقۇيدە 234 ادام بولعان.

بولۋ گۋبەرناتورى ابدۋلازيز ايدىن الدىن الا مالىمەت بويىنشا، ءورتتىڭ قوناقۇيدىڭ ءتورتىنشى قاباتىنداعى مەيرامحانا ايماعىندا باستالىپ، جوعارعى قاباتتارعا تاراعانىن ايتتى. ءقوناقۇي بولۋدىڭ ورتالىعىنان ءبىرشاما قاشىقتىقتا ورنالاسقان. ءورت سوندىرۋشىلەرگە وقيعا ورنىنا جەتۋ ءۇشىن ءبىر ساعاتتان استام ۋاقىت قاجەت بولدى.

قۇتقارۋ جۇمىستارى تاڭەرتەڭگە دەيىن جالعاستى، قۇتقارۋشىلاردىڭ ءقوناقۇيدىڭ كەيبىر بولىكتەرىنە ازەر جەتكەنى حابارلاندى.

تۇرىك اقپارات قۇرالدارىنىڭ حابارلاۋىنشا، كەم دەگەندە ەكى ادام قوناقۇي تەرەزەسىنەن سەكىرىپ، قازا تاپتى. كەيبىرى توسەك جابىندىلارىنان ارقان جاساپ سەكىرۋگە تىرىستى.

شاڭعى نۇسقاۋشىسى نەچمي كەپچەتۋتان تۇرىك تەلەارناسىنا قوناقۇيدى جاقسى بىلەتىندىكتەن قۇتىلىپ شققانىن، ال ونىڭ قۇرىلىمىمەن تانىس ەمەس قوناقتاردىڭ جولى بولماعانىن ايتتى.

- ادامدار تەرەزەدەن: «قۇتقارىڭىزدار» دەپ ايقايلادى. ويتكەنى ىشتە ءتۇتىن بولدى. 20-25 ادامدى شىعارىپ الدىق، - دەدى ول ن ت ۆ تەلەارناسىنا بەرگەن سۇحباتىندا.

ءورتتىڭ شىعۋ سەبەبى ازىرگە بەلگىسىز. ادىلەت ءمينيسترى يىلماز تۋنچ تەرگەۋگە پروكۋراتۋرانىڭ دا قوسىلعانىن ايتتى.

تۇركيا پرەزيدەنتى رەجەپ تايىپ ەردوعان قازا تاپقانداردىڭ تۋىستارىنا كوڭىل ايتتى. اتالعان وقيعاعا بايلانىستى تۇركيادا ءبىر كۇندىك قارالى كۇن جاريالاندى.

سوڭعى جاڭالىقتار