تۇركيانىڭ ەكى اسكەري بازاسى سيريادا ورنالاستىرىلادى
استانا. KAZINFORM - تۇركيا سيريادا ەكى اسكەري بازا قۇرىپ، سيريا ارمياسىن وقىتۋعا كومەكتەسپەكشى، دەپ حابارلايدى Kazinform ءتىلشىسى.

يراننىڭ Mehr News Agency باسىلىمىنىڭ حابارلاۋىنشا، بۇل بازالار تۇركيا مەن سيريا اراسىنداعى جاڭا قورعانىس كەلىسىمى اياسىندا قۇرىلادى. بۇل دەگەنىمىز تۇركياعا قاۋىپ تونگەن جاعدايدا سيريانىڭ اۋماقتىق تۇتاستىعى مەن قاۋىپسىزدىگىن قورعاۋدا كومەك كورسەتۋگە مۇمكىندىك بەرەدى.
كەلىسىمنىڭ ماڭىزدى تۇستارىنىڭ ءبىرى - تۇرىك ماماندارى سيريالىق ساربازدار مەن اسكەري ۇشقىشتاردى وقىتادى. تۇركيا سيريالىق اسكەريلەردى وقىتادى جانە سيريا اسكەري-اۋە كۇشتەرىنىڭ قالىپتاسۋىن اياقتاۋ ءۇشىن تولىق قولداۋ كورسەتەدى.
سيرياداعى تۇرىك اسكەري بازالارى 50 F-16 جويعىش ۇشاعىمەن جانە ۇشقىشسىز اپپاراتتارمەن جابدىقتالادى، بۇل ساراپشىلاردىڭ پىكىرىنشە، اراب ەلىنىڭ قورعانىس قابىلەتىن ايتارلىقتاي كۇشەيتىپ، قاۋىپسىزدىك سالاسىنداعى تاۋەلسىزدىگىن ارتتىرادى.
تۇركيانىڭ اسكەري تەحنيكاسى مەن اۆياتسياسى سيريا ارمياسى مۇنداي قاۋىپتەرگە تولىقتاي قارسى تۇرىپ، تويتارىس بەرۋگە دايىن بولعانعا دەيىن، ەلدىڭ ەگەمەندىگىن بۇزۋعا باعىتتالعان ىقتيمال شابۋىلداردان قورعاۋ ءۇشىن قىزمەت ەتەدى دەپ اتاپ ءوتىلدى.
سونىمەن قاتار، باقىلاۋشىلار مۇنداي اسكەري نىسانداردىڭ قۇرىلۋى جانە قورعانىس سالاسىنداعى ىنتىماقتاستىق تۇركيا مەن سيريا اراسىنداعى ستراتەگيالىق سەرىكتەستىكتىڭ نىعايۋىن كورسەتەدى، بۇل بۇكىل ايماق ءۇشىن، سونىڭ ىشىندە تاياۋ شىعىستاعى كۇشتەر ءۇشىن ماڭىزدى.
بۇعان دەيىن تۇركيا مەن سيريا اراسىنداعى ەكونوميكالىق بايلانىستاردى قالپىنا كەلتىرۋگە باعىتتالعان ماڭىزدى قادامداردى قامتيتىن ساۋدا قارىم-قاتىناستارىنىڭ جول كارتاسىن جۇزەگە اسىرۋعا كىرىسكەنىن جازعان بولاتىنبىز.