تۇركيانىڭ شىعىسىندا جەر سىلكىندى
تۇركيانىڭ مالاتيا قالاسىندا ريحتەر شكالاسى بويىنشا 4,8 بالدىق ءزىلزالا تىركەلدى، دەپ حابارلايدى Kazinform.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە سالدارىن جويۋ باسقارماسىنىڭ (AFAD) حابارلاۋىنشا، جەراستى ءدۇمپۋى 7 شاقىرىم تەرەڭدىكتە تىركەلگەن. ءزىلزالا ەپيتسەنترى مالاتيا قالاسىنىڭ اكچاداگ اۋدانىندا ورنالاسقان.
وسى ايماقتا تۇراتىن كەي ازاماتتار جەر سىلكىنگەننەن كەيىن ۇيلەرىنەن شىعىپ، ءتۇندى كوشەدە وتكىزگەن. ولار جىلىنۋ ءۇشىن وت جاعىپ، ءشاي ىشكەن.
بيىل اقپاندا ەلدىڭ وڭتۇستىك-شىعىسىندا بولعان ءزىلزالادان كەيىن ادامدار قاتتى قورقىپ قالعان. مامانداردىڭ سوزىنشە، ازاماتتار ءبىرىنشى رەت جەر سىلكىنگەننەن كەيىن ونىڭ قايتالانۋىن كوشەدە كۇتۋى قاجەت ەكەن. ەگەر سول كەزدە ادامدار ۇيىنە قايتا كىرىپ كەتپەگەندە قۇرباندار مەن زارداپ شەككەندەر سانى ايتارلىقتاي از بولاتىنىن اتاپ وتكەن.
بۇل جاعدايدا تۇرعىندار زارداپ شەكپەدى. قۇرباندار مەن بۇلىنگەن عيماراتتار تۋرالى اقپارات كەلىپ تۇسكەن جوق. سوعان قاراماستان اۋداندا جەدەل جانە قۇتقارۋ قىزمەتى كەزەكشىلىكتە تۇر.
