تۇركيانىڭ بولۋ تاۋ- شاڭعىسى كۋرورتىندا قازا تاپقاندار سانى 66 عا جەتتى
استانا. KAZINFORM - تۇركيانىڭ بولۋ پروۆينتسياسىنداعى كارتالكايا تاۋ- شاڭعىسى كۋرورتىندا بولعان ورتتەن قازا تاپقاندار سانى 66 عا، جارالانعاندار سانى 51 گە جەتتى، دەپ حابارلايدى Kazinform مەنشىكتى ءتىلشىسى.

ءورت عيماراتتى تەز شارپىپ، قوناقتار مەن قىزمەتكەرلەردىڭ ەۆاكۋاتسيالانۋىن قيىنداتقان. قوناق ءۇي ەڭىس جەردە ورنالاسقاندىقتان، ءبىر جاعىنان عانا شىعۋ مۇمكىن بولدى، بۇل ادامداردىڭ ءوز بەتىمەن قاشۋ مۇمكىندىگىن شەكتەپ، ءورت سوندىرۋشىلەردىڭ ءار تاراپتان سوندىرۋگە جانە اۋقىمدى قۇتقارۋ جۇمىستارىن جۇرگىزۋىنە جول بەرمەدى.
كۋاگەرلەردىڭ ايتۋىنشا، ولاردىڭ كوبى ناقتى قاۋىپسىزدىك جۇيەسى مەن عيماراتتان شىعۋدى دۇرىس ۇيىمداستىرۋدىڭ جوقتىعىنان قالىپ قويعان. زارداپ شەككەندەر، ونىڭ ىشىندە جەرگىلىكتى تۇرعىندار مەن شەتەلدىك تۋريستەر ءارتۇرلى اۋىرلىقتاعى جاراقاتتارمەن، سونىڭ ىشىندە كۇيىك جانە كومىرقىشقىل گازىمەن ۋلانىپ اۋرۋحاناعا جەتكىزىلدى.
تۇركيا ىشكى ىستەر ءمينيسترى الي يەرليكايا قازا بولعانداردىڭ وتباسىلارىنا كوڭىل ايتىپ، ءورتتىڭ سالدارىن جويۋ بويىنشا جۇرگىزىلىپ جاتقان جۇمىستار تۋرالى حابارلادى.
- بىرىنشىدەن، قازا بولعانداردىڭ وتباسىنا كوڭىل ايتامىن. اۋرۋحانادا جاتقانداردىڭ تەزىرەك ساۋىعىپ كەتۋىن تىلەيمىن. ءورت بولعان قوناق ءۇي 12 قاباتتان تۇرادى. ءورت كەزىندە 238 قوناق تىركەلگەن. العاشقى قوڭىراۋ ساعات 03:27 دە ءتۇستى. وسىدان كەيىن بىردەن بارلىق توتەنشە جاعدايلار قىزمەتى ءورتتى سوندىرۋگە اتسالىستى. ساعات 04:15 تە ءورت ءسوندىرىلدى. ءورتتى سوندىرۋگە بارلىعى 156 بىرلىك تەحنيكا مەن ءتۇرلى قىزمەتتەردەن 428 قىزمەتكەر جۇمىلدىرىلدى. وقيعا ورنىندا بارلىق ۋاكىلەتتى ورگانداردىڭ وكىلدەرى ءجۇر، دەپ حابارلادى ءى ءى م باسشىسى ب ا ق وكىلدەرىنە.

ءوز كەزەگىندە تۇركيانىڭ دەنساۋلىق ساقتاۋ ءمينيسترى كەمال مەميشوگلۋ قايعىلى وقيعا سالدارىنان 66 ادام قازا تاۋىپ، تاعى 51 ادام جاراقات العانىن، ولاردىڭ ءبىرىنىڭ جاعدايى اۋىر ەكەنىن حابارلادى. بۇل رەتتە 12 ادامعا قاجەتتى مەديتسينالىق كومەك كورسەتىلىپ، ۇيلەرىنە شىعارىلدى.
قوناق ءۇيدىڭ ءورت قاۋىپسىزدىگى تۋرالى رەسمي سەرتيفيكاتى بار ەكەندىگى باقىلاۋشى ورگاندارعا سۇراق تۋعىزدى. بەلگىلى بولعانداي، اتتەستاتسيا كەزىندە ءورت ينسپەكتسياسى قوناق ءۇيدى بارلىق ستاندارتتارعا سايكەس دەپ تانىعان. الايدا ساراپشىلار ون ەكى قاباتتى عيماراتتا مۇنداي سالدارعا اكەلۋى مۇمكىن بۇزۋشىلىقتاردى انىقتادى.
ال، ءورت قاۋىپسىزدىگىنىڭ قاراپايىم شارتتارى جوق بۇل قوناق ۇيدە ءبىر كۇن تۇرۋ قۇنى ەكى ادامعا 30 مىڭ تۇرىك ليراسىن (شامامەن 455 مىڭ تەڭگە) قۇرايدى.
بيلىك ءورتتىڭ شىعۋ سەبەپتەرىن انىقتاپ، شىعىندى باعالايتىن ارنايى كوميسسيا قۇرىلاتىنىن حابارلادى.