تۇركيانىڭ باتىسىندا ەكى رەت جەر سىلكىندى

  تۇركيانىڭ بۋرسا قالاسى مەن ىستانبۇلدىڭ ەۋروپالىق بولىگىندە اراعا بىرنەشە مينۋت سالىپ بىردەن ەكى جەر سىلكىنىسى بولدى.

بۇل قالالاردىڭ تۇرعىندارى قاتارىنان بىرنەشە جەراستى ءدۇمپۋىن سەزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تۇركيا توتەنشە جاعدايلاردىڭ الدىن الۋ جانە سالدارىن جويۋ باسقارماسىنىڭ (AFAD) اقپاراتىنا سايكەس، 5,1 بالدىق العاشقى جەراستى ءدۇمپۋى انكارا ۋاقىتىمەن ساعات 10:42- دە (استانا ۋاقىتىمەن ساعات 13:42) تىركەلگەن.

ءزىلزالا وشاعى-ءمارمار تەڭىزىندەگى گەمليك شىعاناعىندا 8,98 ك م تەرەڭدىكتە. جەر سىلكىنىسىنىڭ ەپيتسەنترى بۋرسا پروۆينتسياسىنداعى مۋدانيا قالاسىنىڭ ماڭىندا ورنالاسقان.

ساعات 10:45 تە وسى اۋداندا ريحتەر شكالاسى بويىنشا ماگنيتۋداسى 4,5 بالدىق تاعى ءبىر جەر سىلكىنىسى تىركەلگەن.

تۇركيانىڭ ىشكى ىستەر ءمينيسترى ءالي يەرليكايانىڭ حابارلاۋىنشا، قازىرگى كەزدە وكىلەتتى ورگاندار قالالىق ينفراقۇرىلىمدى زەرتتەۋ جانە تەكسەرۋ جۇمىسىن جۇرگىزىپ جاتىر.

وسى ساعاتتا عيماراتتار مەن قۇرىلىستاردىڭ قيراعانى تۋرالى اقپارات تۇسكەن جوق.

تۇرعىندار اراسىندا قازا تاپقاندار مەن زارداپ شەككەندەر جوق.

ەسكە سالا كەتسەك، 1-جەلتوقساندا تۇركيانىڭ مالاتيا قالاسىندا ماگنيتۋداسى 4,8 بالدىق جەر سىلكىنىسى بولدى. جەراستى ءدۇمپۋى 7 ك م تەرەمدىكتە تىركەلدى.

ونىڭ وشاعى مالاتيا قالاسىنىڭ اكچاداگ اۋدانىندا ورنالاسقان.