تۇركيانىڭ العاشقى سپۋتنيگى وربيتاعا ءساتتى شىعارىلدى
استانا. قازاقپارات - Transporter-12 ميسسياسى اياسىندا SpaceX كومپانياسىنىڭ Falcon 9 زىمىرانى Fergani Space FGN-100-d1 تۇرىك كومپانياسىنىڭ العاشقى جەر سەرىگىن وربيتاعا ءساتتى شىعاردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ۇشىرۋ وپەراتسياسى ا ق ش- تاعى ۆاندەنبەرگ اۋە كۇشتەرىنىڭ بازاسىندا ءوتتى جانە SpaceX كومپانياسىنىڭ اككاۋنتتارىندا تىكەلەي ەفيردەن كورسەتىلدى.
Transporter-12 ميسسياسى كەزىندە Falcon 9 زىمىرانى عارىشقا 131 پايدالى جۇكتى ۇشىردى. ولاردىڭ اراسىندا كۋبوساتتار، ميكروسپۋتنيكتەر جانە وربيتالىق كولىكتەر بار. FGN-100-d1 سپۋتنيگىنەن باسقا عارىشتىق تەحنولوگيالاردى بەلسەندى دامىتاتىن تاعى ءبىر تۇرىك كومپانياسى Plan-S سپۋتنيكتەرى دە وربيتاعا شىعارىلدى.
Fergani Space سپۋتنيگىنە ارنالعان سۋتەگىنىڭ اسقىن توتىعى نەگىزىندەگى عارىش قوزعالتقىشىنىڭ سىناقتارى وتكەن جىلدىڭ مامىر ايىندا ءساتتى اياقتالىپ، بۇل ميسسياعا دايىندىقتىڭ نەگىزگى كەزەڭدەرىنىڭ ءبىرى بولدى.
Fergani Space ءتىڭ نەگىزىن قالاۋشى، Baykar ديرەكتورلار كەڭەسىنىڭ ءتوراعاسى سەلچۋك بايراكتار تۇركيانىڭ ءبىرىنشى جەر سەرىگىن وربيتاعا ءساتتى شىعارعانىن ايتتى.
- ءبىز 2022 -جىلى ىسكە قوسقان Fergani Space كاسىپورنى 106 ادامنان تۇراتىن ۇلكەن وتباسى رەتىندە دامۋىن جالعاستىرىپ كەلەدى. بۇگىندە ءبىرىنشى تۇرىك جەر سەرىگىن وربيتاعا شىعاردىق. ءبىزدىڭ سپۋتنيكتەر پوزيتسيالاۋ جانە بايلانىس ماقساتىندا تومەن وربيتالىق شوقجۇلدىز رەتىندە قىزمەت ەتەدى. بۇل جوبانى ءوز كۇشىمىزبەن جۇزەگە اسىردىق. وسى كەزدە ءبىزدىڭ جەر سەرىگىمىز قاجەتتى بيىكتىككە جەتىپ، العاشقى مانيەۆرلەرىن اياقتادى، - دەدى سەلچۋك بايراكتار.
مامانداردىڭ پىكىرىنشە، FGN-100-d1 سپۋتنيگى Fergani Space كومپانياسىنىڭ عارىشتىق تەحنولوگيالار مەن ناۆيگاتسيالىق جۇيەلەردى دامىتۋ جونىندەگى جاھاندىق ميسسياسىنداعى العاشقى قادامى بولدى. بۇل عارىش جوباسىنىڭ ءساتتى جۇزەگە اسۋى تۇركيانىڭ عارىشتى يگەرۋدەگى ءرولىنىڭ ارتىپ كەلە جاتقانىن جانە ونىڭ ۇلتتىق سپۋتنيكتىك ينفراقۇرىلىمدى قۇرۋ امبيتسيالارىن تانىتىپ وتىر.