تۇركيالىق كينوكومپانيا جوشى حان تۋرالى سەريالدى تەك قانا قازاقستاندا تۇسىرەتىن بولدى
استانا. قازاقپارات - 14 - قاڭتاردا ىستامبۇلداعى Karga Seven Pictures كينوكومپانياسىنىڭ كەڭسەسىندە شارتتى اتاۋى «التىن يمپەريا» جوباسى بويىنشا شىعارماشىلىق توپتىڭ وتىرىسى ءوتتى.

كەزدەسۋگە قازاقستاننىڭ مەملەكەتتىك كەڭەسشىسى ەرلان قارين، Karga Seven Pictures كومپانياسىنىڭ تەڭ قۇرىلتايشىلارى ەمرە ساحين مەن فيكرەت مانوگلۋ قاتىسىپ، سەريالدىڭ 6 ەپيزودىنىڭ سەناريلەرى مەن باستى رولدەرگە اكتەرلىك قۇرامىن بەكىتتى.
ايتا كەتەيىك، 4000 نان استام ءوتىنىمنىڭ ىشىنەن 350 اكتەر ىرىكتەلىپ الىندى. ولاردىڭ اراسىندا 250 قازاقستاندىق جانە شۆەتسيا، بەلگيا، انگليا، گەرمانيا، ا ق ش، موڭعوليا ەلدەرىنەن 100 ءارتىس بار. وعان قوسا، كەزدەسۋدە كوستيۋمدەر، دەكوراتسيالار مەن رەكۆيزيتتەر تانىستىرىلعان.

بۇعان دەيىن قازاقستاندا سەريال ءتۇسىرىلىمىنىڭ تەك %40 ى وتەدى دەپ جوسپارلانعان ەدى. الايدا سەريالدىڭ باس پروديۋسەرى جانە رەجيسسەرى ەمرە ساحين لوكاتسيالاردى جان-جاقتى زەرتتەگەن سوڭ، ءتۇسىرىلىمدى تولىعىمەن قازاقستانعا كوشىرۋدى ۇيعارعان. ءتۇسىرىلىم جۇمىستارى 2025 -جىلدىڭ اقپانىندا باستالادى.
سونىمەن بىرگە، كاستينگتىڭ ەكىنشى كەزەڭىن وتكىزۋ جوسپارلانىپ وتىر. بۇل ەكىنشى پلانداعى جانە بالالار رولدەرىنە ارنالماق.

«دارا» پرەزيدەنتتىك باستامالار قورى جۇزەگە اسىرىپ جاتقان جانە جوشى حان ۇلىسىنىڭ 800 جىلدىعىنا ورايلاستىرىلعان «التىن وردا» سەريالىنىڭ ستسەنارييىن ازىرلەۋگە دجاستين پوللارد («ۆيكينگتەر»)، كلەر مۋرسوم («زاڭنان تىس پاتشا») سياقتى تانىمال سەناريستەر، سونداي- اق قازاقستاندىق جانە حالىقارالىق تاريحشىلار مەن ساراپشىلار قاتىسقان.

سەريال اۆتورلارى جوشى ۇلىسىنىڭ، التىن وردانىڭ تاريحىنا، كوشپەلى حالىقتار مەن قازاقتىڭ مادەني قۇندىلىقتارى مەن ءومىر سالتىنا زەرتتەۋ جۇرگىزگەن.
التىن وردانىڭ تاريحى حالىقارالىق اۋديتوريا مەن ديستريبيۋتورلاردىڭ ۇلكەن قىزىعۋشىلىعىن تۋدىرىپ وتىر. جاڭا سەريال الەم كورەرمەندەرىنىڭ نازارىن اۋداراتىن اۋقىمدى جوبا بولا الادى.

بۇعان دەيىن جوشى حان تۋرالى سەريالعا كاستينگ ءجۇرىپ جاتقانىن حابارلاعان ەدىك.

سونداي-اق، Kazinform اگەنتتىگى جوشى حان تۋرالى عىلىمي ينستيتۋتتىڭ كىشى عىلىمي قىزمەتكەرى ابىلبەك قاراتايەۆپەن سۇحبات جاريالادى.

