تۇركياداعى وقۋ-جاتتىعۋدا دەسانتشى قازاقستان تۋىن اۋەدە جەلبىرەتتى
استانا. KAZINFORM - قازاقستاندىق دەسانتشىلار تۇركيادا ءوتىپ جاتقان EFES-2024 كوپۇلتتى كوماندالىق-شتابتىق وقۋ-جاتتىعۋىنا قاتىسىپ جاتىر. قازاقستان قۇراماسىنىڭ ساپىندا الماتى، قونايەۆ، جەتىسۋ گارنيزوندارىنىڭ قۇرامالارى مەن اسكەري بولىمدەرىنىڭ ۇزدىك اسكەري قىزمەتشىلەرى بار.
EFES-2024 وقۋ- جاتتىعۋلارى تاجىريبە الماسۋ، قاتىسۋشى ەلدەر اسكەري قىزمەتشىلەرىنىڭ بىرلەسكەن قىزمەتىن ۇيىمداستىرۋ، ولاردىڭ كاسىبيلىگى مەن شتاب وفيتسەرلەرىنىڭ كارتادا شەشىم قابىلداۋ داعدىلارىن ارتتىرۋ ماقساتىندا وتكىزىلەدى.
قازاقستاندىق دەسانتشىلار قاتىساتىن پراكتيكالىق ءىس- شارالار يزمير قالاسىنىڭ ماڭىنداعى «دوعانبەي»، «كارتال» پوليگوندارى مەن «قىرعىز» جاتتىعۋ الاڭىندا وتۋدە.
مانيەۆرلەر بارىسىندا قازاقستاندىق پاراشيۋتشىلەر توبى تۇركيا رەسپۋبليكاسىنىڭ INTUDER جانە فرانسۋزدىق LEGEND- M پاراشيۋت جۇيەلەرىمەن تانىستى، سونداي-اق قازاقستاندا پايدالانىلاتىن INSIDER-300 SF پاراشيۋت جۇيەسىن كوپۇلتتى كونتينگەنتكە ۇسىندى.
اتىس پوزيتسياسىنىڭ تەوريالىق نەگىزدەرىن جانە REMINGTON، Mc MILAN TAC-50, M-110 مەرگەندىك مىلتىقتارىنىڭ تاكتيكالىق جانە تەحنيكالىق سيپاتتاماسىن زەردەلەگەننەن كەيىن دەسانتتىق-شابۋىلداۋ اسكەرلەرىنىڭ مەرگەن جۇبى 300 جانە 500 مەتر قاشىقتىقتاعى نىساناعا ءدال تيگىزە ءبىلدى.
شابۋىلداۋ توبىنىڭ مىندەتتەرىنە 5-7 مەتر بيىكتىكتەن فال بويىنشا دەسانت ءتۇسىرۋ جانە كوپۇلتتى كونتينگەنت قۇرامىندا تەرروريستىك توپتى جويۋعا قاتىسۋ كىرەدى.
كۇندىزگى جانە تۇنگى ۋاقىتتا اۆيا كوزدەۋشىلەر قۇرامىنداعى تاكتيكالىق توپ نىساناعا لازەرلىك باعىتتاۋ بويىنشا كۇندىزگى جانە تۇنگى مىندەتتەردى پىسىقتايدى.
ال سانيتار نۇسقاۋشىلار تەڭىز دەسانتىن ءتۇسىرۋ جونىندەگى ءىس- شارالارعا قاتىسادى.
وقۋ- جاتتىعۋ باسشىلىعى قازاقستان تۋىمەن پاراشيۋتپەن سەكىرگەن 35-گۆارديالىق دەسانتتىق- شابۋىلداۋ بريگاداسى 9-روتاسىنىڭ سەرجانتى 2-سىنىپتى سەرجانت سەرىك نوعايەۆتى ەرەكشە اتاپ ءوتتى.
ول 3200 مەتر بيىكتىكتەن جەلدىڭ ەكپىنى سەكۋندىنا 8 مەتردەن اساتىن كۇردەلى مەتەورولوگيالىق جاعدايدا سەكىرگەن.
EFES-2024 كوپۇلتتى وقۋ-جاتتىعۋى 30-مامىرعا دەيىن جالعاسادى.
بەلسەندى كەزەڭدە قازاقستاندىق دەسانتشىلار وقۋ-جاتتىعۋ جوسپارىنا سايكەس وقۋ- جاۋىنگەرلىك مىندەتتەردى ورىنداۋى ءتيىس.
