تۇركياداعى قوناقۇيدە بولعان ورتتەن قازا تاپقاندار سانى 79 ادامعا جەتتى

استانا. KAZINFORM - تۇركيانىڭ بولۋ پروۆينتسياسىنداعى كارتالكايا تاۋ شاڭعىسى كۋرورتىنداعى قوناقۇيدەگى ورتتەن قازا تاپقاندار سانى 79 ادامعا جەتتى، دەپ حابارلايدى Kazinform مەنشىكتى ءتىلشىسى.

Түркияның тау шаңғы курортындағы өрт: қаза тапқандар саны 76-ға жетті
Фото: bbc.com

ايماقتىق پروكۋراتۋرانىڭ مالىمەتىنشە، دنق ساراپتاماسىنان كەيىن قازا بولعان تاعى بىرنەشە ادامنىڭ تۇلعاسى انىقتالدى.

باستاپقىدا 76 ادام قازا تاۋىپ، 50 دەن استام ادام جاراقات العانى حابارلانعان. الايدا قۇربانداردىڭ جەكە باسىن انىقتاۋ جۇمىستارى اياقتالعاننان كەيىن تۇرىك بيلىگى جاڭارتىلعان دەرەكتەردى راستادى.

ءورت سەيسەنبىگە قاراعان ءتۇنى شىعىپ، قوناقۇي قوناقتارى تۇرعان عيماراتتى شارپىعان. ولاردىڭ كوپشىلىگى جوعارى قاباتتان ارقان رەتىندە بايلانعان توسەك - ورىن جابدىعىن پايدالانىپ تۇسۋگە تىرىستى.

قايعىلى وقيعانىڭ سەبەپتەرىن تەرگەۋ اياسىندا 11 ادام ۇستالدى، ولاردىعڭ اراسىندا بولۋ قالاسى مەرىنىڭ ورىنباسارى، ورتكە قارسى قىزمەت باستىعىنىڭ ورىنباسارى جانە قوناقۇي يەسى بار.

تۇركيانىڭ تۋريزم جانە مادەنيەت ءمينيسترى مەحمەت نۋري ەرسوي بۇعان دەيىن قوناقۇيدىڭ تۇراقتى تەكسەرىستەن وتكەنىن جانە ءورت قاۋىپسىزدىگىن بۇزۋ فاكتىلەرى انىقتالماعانىن مالىمدەگەن. ولاي بولعانىمەن، تەرگەۋ امالدارى جالعاسىپ وتىر.

بۇعان دەيىن تۇركيا پرەزيدەنتى رەجەپ تايىپ ەردوعان بولۋ قالاسىنداعى كارتالكايا تاۋ- شاڭعىسى كۋرورتىندا ورتتەن قازا تاپقان گيۋلتەكين وتباسىن جەرلەۋ راسىمىنە قاتىسقانىن جازعان بولاتىنبىز.

ەسكە سالساق، مەملەكەت باسشىسى تۇركيا پرەزيدەنتىنە كوڭىل ايتۋ جەدەلحاتىن جولدادى.

سونىمەن قاتار، مەملەكەت باسشىسى قازاقستان حالقىنىڭ جانە ءوزىنىڭ اتىنان تۇركيا پرەزيدەنتى رەجەپ تايىپ ەردوعان مەن جاقىندارىنان ايىرىلعان وتباسىلارعا، سونداي- اق باۋىرلاس تۇرىك حالقىنا كوڭىل ايتىپ، زارداپ شەككەندەردىڭ تەز ارادا ساۋىعىپ كەتۋىنە تىلەكتەستىك ءبىلدىردى.

 

سوڭعى جاڭالىقتار