تۇركياداعى قايعىلى وقيعادان كەيىن ءورت ءسوندىرۋ قۇرىلعىلارىنىڭ باعاسى كوتەرىلدى

استانا. KAZINFORM - بولۋداعى كارتالكايا تاۋ-شاڭعىسى كۋرورتىنداعى Grand Kartal قوناقۇيىندە بولعان ءىرى ورتتەن كەيىن تۇركيادا ءورت ءسوندىرۋ قۇرىلعىلارىنا سۇرانىس 300 پايىزعا ارتتى، دەپ حابارلايدى Kazinform مەنشىكتى ءتىلشىسى.

ر
Фото: aydinlik.com.tr

بەلگىلى بولعانداي، 78 ادامنىڭ ءومىرىن قيعان قوناقۇيدەگى ءورت وقيعاسى بۇكىل تۇركيا مەن باسقا ەلدەردى ەسەڭگىرەتىپ، ءورت قاۋىپسىزدىگى ماسەلەلەرىنە نازار اۋدارتتى.

ەل بيلىگى مەملەكەتتىك جانە جەكەمەنشىك نىسانداردىڭ ءورت قاۋىپسىزدىگى نورمالارىنىڭ ساقتالۋىن تەكسەرۋدى كۇشەيتتى. جىل باسىنان بەرى تۇركيادا بارلىق كاسىپورىن قىزمەتكەرلەرگە ءورت قاۋىپسىزدىگى بويىنشا جۇيەلى تۇردە وقىتۋدى تالاپ ەتەتىن ەرەجە كۇشىنە ەندى.

سونىمەن بىرگە، بولۋداعى وقيعادان كەيىن ءورت قاۋىپسىزدىگى بويىنشا وقىتۋمەن اينالىساتىن كومپانيالارعا جاڭا زاڭ تالاپتارىن ورىنداۋعا جانە ىقتيمال قايعىلى وقيعالاردىڭ الدىن الۋعا تىرىساتىن كاسىپكەرلەردىڭ وتىنىشتەرى كوپ ءتۇستى. ءورت سوندىرگىشتەر سياقتى ءورت ءسوندىرۋ قۇرالدارىنا سۇرانىس تا كۇرت ءوستى. جاقسى پايدا الۋ ءۇشىن كەيبىر كاسىپورىندار بۇل ونىمدەردىڭ باعاسىن ايتارلىقتاي ءوسىردى.

وسى ارادا تۇركيانىڭ ساۋدا مينيسترلىگى ءورت ءسوندىرۋ قۇرالدارىن ساتاتىن جەتكىزۋشىلەردى تەكسەرۋدى كۇشەيتتى. قازىردىڭ وزىندە جوعارى باعا قويعان كاسىپورىندارعا ءتيىستى جازالاۋ شارالارى قولعا الىنىپ جاتىر.

بەلگىلى بولعانداي، تۇركيا نارىعىندا ساتىلاتىن ءورت سوندىرگىشتەردىڭ 90 پايىزى - 6 كەلىلىك مودەلدەر. ولاردىڭ ورتاشا باعاسى 900 دەن 1100 تۇرىك ليراسىنا دەيىن (شامامەن 12000-15400 تەڭگە) ارالىعىندا. ۇلكەنىرەك سوندىرگىشتەردىڭ باعاسى 2000-8000 ليرا (28000-112000 تەڭگە) ارالىعىندا. ساراپشىلاردىڭ ايتۋىنشا، بۇل وتە قىمبات.

سونىمەن قاتار، باسقا دا ءورت ءسوندىرۋ قۇرالدارى، سونىڭ ىشىندە ءورت دابىلىنىڭ جۇيەلەرى، ءارتۇرلى تەحنيكالىق قۇرالدار مەن اپاتتىق شىعۋ جولدارىنىڭ ساتىلىمى دا كۇرت ءوستى. كوپتەگەن كاسىپورىندار ءوز عيماراتتارىن شۇعىل تۇردە قاجەتتى قۇرال-جابدىقتارمەن جابدىقتاۋدى باستادى، بۇل وسى كلاستاعى تاۋارلاردىڭ وزىندىك قۇنىنىڭ ايقىن ءوسۋىن تۋدىردى.

بولۋداعى قايعىلى وقيعا تۇرىك قوعامى مەن بيزنەس قاۋىمداستىعىن قاۋىپسىزدىككە دەگەن كوزقاراسىن قايتا قاراۋعا يتەرمەلەگەن ماڭىزدى ساباق بولدى. ادامدار ءومىردى ورتتەن قورعاۋ ءۇشىن بەلسەندى شارالاردى قولدانا باستادى.

ەسكە سالساق، تۇركيانىڭ بولۋ پروۆينتسياسىنداعى كارتالكايا تاۋ-شاڭعىسى كۋرورتىندا بولعان جانتۇرشىگەرلىك ءورت بولدى. سالدارىنان 79 ادام قازا تاپتى.

كەيىننەن تۇركيا بولۋ تراگەدياسىنان كەيىن ازا تۇتۋ كۇنىن جاريالادى.

سوڭعى جاڭالىقتار