تۇركيادا ساپاسىز ونىمدەردى تۇتىنۋ قاۋپى تۋرالى ەسكەرتتى
استانا. KAZINFORM - تۇركيادا قاسيەتتى رامازان ايىندا ەڭ قاجەتتى ازىق-تۇلىك ونىمدەرىن تاڭداعاندا جانە ساتىپ الاردا ساقتىق شارالارىن ساقتاۋ كەرەك، دەپ حابارلايدى Kazinform مەنشىكتى ءتىلشىسى.
تۇرىك قولونەرشىلەر مەن ساۋداگەرلەر كونفەدەراتسياسىنىڭ (TESK) ءتوراعاسى بەنديەۆي پالاندەكەن قاۋىپسىزدىك ستاندارتتارىنا سايكەس كەلمەيتىن، سەرتيفيكاتى جوق ازىق-تۇلىك ونىمدەرىن تۇتىنۋ قاۋپىنىڭ ارتۋىنا بايلانىستى الاڭداۋشىلىق ءبىلدىردى.
بۇل تۇرعىدا ول اسىرەسە رامازان ايىندا ارنايى ونىمدەرگە سۇرانىس جوعارى بولعان كەزدە ونى تاڭداۋ كەزىندە مۇقيات بولۋ ماڭىزدى ەكەنىن اتاپ ءوتتى.
پالاندەكەننىڭ اتاپ وتۋىنشە، رامازان ايىندا بازارلار مەن ينتەرنەتتە ساتىلاتىن تاتتىلەر، كونديتەرلىك ونىمدەر، ىرىمشىك، ءزايتۇن، ەت ونىمدەرى، شۇجىق پەن قاقتالعان شۇجىق كولەمى ارتتى. بۇل رەتتە تارتىمدى باعا مەن سىرتقى ءتۇرى ءونىمنىڭ قاۋىپسىزدىگىنە ءارقاشان كەپىلدىك بەرمەيتىنىن ەستە ۇستاعان ءجون. اسىرەسە جول جيەگىندە نەمەسە كۇماندى ينتەرنەت- دۇكەندەردە ساتىلاتىن كەيبىر ونىمدەر قولدان جاسالاۋى نەمەسە سانيتارلىق نورمالارعا سايكەس كەلمەۋى مۇمكىن.
ول تۇتىنۋشىلاردى اباي بولۋعا جانە ارزان ءارى سەرتيفيكاتى جوق ونىمدەردى ساتىپ الۋدان اۋلاق بولۋعا شاقىرىپ، كەي جاعدايلاردا وندىرۋشىلەر قاۋىپتى ونىمدەردى «تابيعي» نەمەسە «ەكولوگيالىق تازا» دەپ كورسەتۋگە تىرىساتىنىن اتاپ ءوتتى. دەنساۋلىقتى قورعاۋ ءۇشىن پالاندەكەن نارىقتا ءوزىن تانىتقان جانە بارلىق قاجەتتى ساپا سەرتيفيكاتتارى بار سەنىمدى ساتۋشىلار مەن برەندتەرگە جۇگىنۋدى كەڭەس ەتتى.
TESK ساراپشىلارى ازىق- تۇلىك قاۋىپسىزدىگى ستاندارتتارىن ساقتاۋ ادامدار مەن ولاردىڭ دەنساۋلىعى ءۇشىن عانا ەمەس، سونىمەن قاتار ساۋدا جەلىلەرى مەن وندىرۋشىلەردىڭ بەدەلىن ساقتاۋ ءۇشىن دە ماڭىزدى ەكەنىن ەسكە سالدى.
اقپان ايىندا سەناتتىڭ جالپى وتىرىسىندا «قازاقستان ۇكىمەتى مەن تۇركيا ۇكىمەتى اراسىنداعى وسىمدىكتەر كارانتينى جانە ولاردى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.
بۇعان دەيىن قازاقستان تۇركياعا ەت جەتكىزەتىنىن جازعان بولاتىنبىز.
