تۇركيادا ەرلەر سۇلۋلىق سالوندارىنا اقشا جۇمساۋدان ايەلدەردى باسىپ وزدى
استانا. KAZINFORM - سۇلۋلىق سالوندارىنىڭ ايەلدەرگە ارنالعان كەي قىزمەت ءتۇرى تۇرىك ەرلەرى اراسىندا تانىمال بولىپ كەلەدى.
يزمير شاشتارازدار قاۋىمداستىعىنىڭ باسشىسى شيۋكريۋ بيلگين تۇركيادا ەرلەردىڭ سۇلۋلىق سالون قىزمەتتەرىن بەلسەندى قولدانا باستاعانىن ايتتى.
تۇركيادا ەر ادامدار اراسىندا مانيكيۋر، پەديكيۋر، قاسقا كوررەكسيا جاساتۋ، ءتىپتى كىرپىككە كۇتىم جاساۋ ءتارىزدى قىزمەت تۇرلەرى تانىمال. ونىڭ ايتۋىنشا، ەرلەر باربەرشوپ پەن سۇلۋلىق سالوندارىنا ءجيى بارىپ، سونىڭ ىشىندە بۇرىن تەك ايەلدەر عانا بارادى دەپ ەسەپتەلگەن قىزمەتتەردى ءجيى قولدانادى.
بيلگين كەي جاعدايدا ەر ادامدار بۇل پروتسەدۋرالارعا ايەلدەرگە قاراعاندا كوبىرەك اقشا جۇمسايتىنىن اتاپ ءوتتى. ءتىپتى كىرپىك كۇتىمىن وزدەرى جاساي باستاعان ەر ادامدار پايدا بولعانىن ايتادى.
- قازىر ەرلەر سۇلۋلىق سالوندارىنا ايەلدەرگە قاراعاندا ءجيى بارادى. سوڭعى جىلدارى ايەلدەرگە الۋان ءتۇرلى قىزمەتتەر ۇسىنىلىپ كەلەدى، ءبىراق ولار ادەتتەرىن وزگەرتپەدى، بۇرىنعى قارقىنمەن بارادى. ال تۇركياداعى ەرلەر وزدەرىنىڭ سىرتقى كەلبەتتەرىنە بەلسەندى تۇردە كۇتىم جاساي باستادى، - دەيدى شاشتارازدار قاۋىمداستىعىنىڭ باسشىسى.
ونىڭ ايتۋىنشا، تۇركيادا قىزمەت سانىنىڭ ارتۋىنا بايلانىستى قاراپايىم شاشتارازدارعا بۇرىنعىداي سۇرانىس جوق.
