تۇركيادا ەر ادام 45 مىڭ 376 جىلعا سوتتالدى
استانا. قازاقپارات - تۇركيادا ەر ادام 45376 -جىلعا سوتتالدى. ول ازىرلەگەن ونلاين-فەرما ويىنى قارجى پيراميداسى بولىپ شىقتى.
Çiftlik بانكىنىڭ نەگىزىن قالاۋشى مەحمەت ايدىن مەن ونىڭ اعاسى فاتيح ايدىن ءارقايسىسى 45376 جىل 6 ايعا باس بوستاندىعىنان ايىرىلدى.
مەحمەت ايدىن مەن ۇلكەن اعاسى فاتيح ايدىن بار 20 ايىپتالۋشى 5 بولەك فايل بويىنشا سوتتالىپ جاتقان Çiftlik Bank ءىسىنىڭ سوڭعى وتىرىسى تاڭەرتەڭ باستالدى. سوڭعى ءسوزى سۇرالعان مەحمەت ايدىن «مەن ەشقانداي جالعان مالىمدەمە جاساعان جوقپىن، اقتالۋىمدى قالايمىن» دەدى.
4 مىڭنان استام جابىرلەنۋشى بار چيفتليك بانك ىسىنە قاتىستى ۇكىمدى جاريالاۋ ءۇشىن وتىرىس ساعات 15:00-گە قالدىرىلدى. سوت القاسى ۇزىلىستەن كەيىن جينالىپ، مەحمەت ايدىن مەن ونىڭ ۇلكەن اعاسى فاتيح ايدىننىڭ ءارقايسىسىنا 45376 جىل 6 ايعا باس بوستاندىعىنان ايىرۋ جازاسىن تاعايىنداۋ تۋرالى شەشىم قابىلدادى.
كارتالداعى انادولى سوتىنىڭ 6-شى جوعارى قىلمىستىق سوتىندا وتكەن سوت وتىرىسىنا ۇستالعان ايىپتالۋشىلار مەحمەت ايدىن، فاتيح ايدىن، حاۆۆا ءوزاي جانە وسمان نايم كايا قاتىستى. مەحمەت ايدىن مەن ونىڭ اعاسى فاتيح ايدىننىڭ «اقپاراتتىق جۇيەلەر ارقىلى الاياقتىق»، «قىلمىستىق ۇيىم قۇرۋ» جانە «قىلمىستىق جولمەن الىنعان مۇلىكتى جىلىستاتۋ» قىلمىستارى ءۇشىن 4414 رەت جازالانۋى تالاپ ەتىلەتىن ءىستىڭ سوڭعى وتىرىسىنا قاماۋعا الىنباعان كەيبىر ايىپتالۋشىلار مەن ولاردىڭ ادۆوكاتتارى دا قاتىستى.
«مەن الداۋ نيەتىمەن جاساعان جوقپىن»
تۇتقىندالعان ايىپتالۋشى مەحمەت ايدىن ءوزىن قورعاۋىندا: «مەن ەگجەي-تەگجەيلى جازباشا قورعاندىم. مەن مۇنى الداۋ نيەتىمەن جاساعان جوقپىن؛ مەن ەشكىمدى الدامادىم. مەن الداۋ نيەتىم دە بولعان جوق. مەملەكەت مەنىڭ مۇلكىمدى تاركىلەگەندىكتەن شىعىندى وتەي المادىم. مەنى بوساتۋدى تالاپ ەتەمىن»، - دەدى ول.
