تۇركيادا «قىز جىبەك» ءانسامبلى حالىقارالىق بايقاۋدا جەڭىمپاز اتاندى

ورال. KAZINFORM - تۇركيانىڭ چاناككالە قالاسىندا 14-18-تامىز ارالىعىندا وتكەن VIII International Troia Danse and Musik Competetion فەستيۆال-بايقاۋىندا كازتالوۆ اۋدانىنىڭ ۇلگىلى «قىز جىبەك» ءداستۇرلى انشىلەر ءانسامبلى ۇزدىك اتاندى.

اتالمىش حالىقارالىق دوداعا الەمنىڭ 20 دان استام ەلىنەن ۇمىتكەرلەر قاتىسىپ، باق سىنادى.

بۇل جولى بايان قابيەۆا مەن ونىڭ ۇلى اسىلحان بولتانوۆ جەتەكشىلىك ەتەتىن «قىز جىبەك» ءانسامبلىنىڭ 14 وقۋشىدان قۇرالعان كىشى توبى ونەر كورسەتىپ، جالعىز باس جۇلدەگە يە بولدى.

تانىمال ءانشى-تەرمەشى، سازگەر-ۇستاز، «ەرەن ەڭبەگى ءۇشىن» مەدالىنىڭ يەگەرى بايان قابيەۆانىڭ Kazinform تىلشىسىنە ءمالىم ەتكەنىندەي، انسامبل باس جۇلدەگە قوسا ۇزدىك كوستيۋمى ءۇشىن ماراپاتتالدى.

«تاعى ءبىر ايتا كەتەتىن جايت، قازان ايىندا ماسكەۋ قالاسىندا رەسەيدىڭ حالىق ءارتىسى نادەجدا بابكينا تەاترىندا وتەتىن حالىقارالىق بايقاۋعا تەگىن جولداما الدىق. وعان دۇنيەجۇزى ەلدەرىنەن ۇزدىك جاس ونەرپازدار كەلىپ، وزىپ شىققاندارى كرەملدە ونەر كورسەتەدى. وسىمەن يزمير مەن ساكارياعا، چاناككالەگە ءۇشىنشى رەت بارىپ جاتىرمىز. بۇعان دەيىن ءبىرىنشى ورىن الساق، بۇل جولى گران-پريگە قول جەتكىزدىك. تۇرىك حالقى قازاقستان دەسە، ەلەڭ ەتە قالادى ەكەن. ىقىلاستارى ەرەكشە، كورەرمەندەر قاتارى دا قالىڭ. چاناككالە قالاسىنىڭ باسشىسى ءبىزدى قابىلداپ، قۇرمەت كورسەتتى. بۇرىن كاسىپكەرلەر دەمەۋشىلىك بىلدىرسە، وسى جولى قاجەتتى قارجىنى اتا-انالار تاۋىپ بەردى. اۋدان اكىمى اسلانبەك سارقۇلوۆ ساپارىمىزدىڭ بارىسىن قاداعالاپ وتىردى. جول قيىندىقتارى دا بولماي قالعان جوق. جالپى، بولاشاقتا وسىنداي فەستيۆالدەرگە بارۋعا بيۋجەت ارقىلى دا قولداۋ كورسەتىلسە ەكەن»، دەيدى بايان قۇباي قىزى.

ونىڭ ايتۋىنشا، «قىز جىبەك» ءانسامبلى الدىمەن تۇرىكتىڭ بەسىك جىرىن، سودان كەيىن اسىلحان بولتانوۆتىڭ «قازاق ەلى جاساسىن!» ءانىن ورىندادى. ەكىنشى كۇنى «اعايشا»، «ساۋلەم-اي» حالىق اندەرىن اۋەلەتتى.

«انسامبل مۇشەلەرىنىڭ ءبىرى الينا سۇلتان تۇرىك ءتىلىن تىم-ءتاۋىر مەڭگەرگەن. بيىل قاراوزەن مەكتەپ-ليتسەيىنىڭ 11-سىنىبىنا بارادى. مەندە التى جىل وقىپ، تەرمە سىنىبىن ءبىتىردى. بولاشاقتا ءداستۇرلى ءانشى بولۋدى ماقسات ەتىپ وتىر. وسىنداي شاكىرتتەرىمىز از ەمەس»، دەدى ب. قابيەۆا.

«مەنىڭ تۇرىك ءتىلۋىن ءبىلۋىم جەرگىلىكتى حالىقپەن اڭگىمەلەسۋگە جاقسى بولدى. ونەرىمىزدىڭ ارقاسىندا ەل كوردىك، جەر كوردىك. وسىنداي مۇمكىندىكتى جاساعان ۇستازدارىمىزعا، اتا-انامىزعا العىسىمىزدى ايتامىز»، دەدى الينا سۇلتان.

ەسكە سالا كەتەيىك، بۇدان بۇرىن قازاقستاندىق ءانسامبلدىڭ تۇركيادا وتكەن حالىقارالىق بايقاۋدا ءبىرىنشى ورىن العانىن جازعان بولاتىنبىز.